AQSHda xavfli moddalarni olib ketayotgan yuk poyezdi relsdan chiqib ketdi (video)

AQSHning Ogayo shtatida xavfli moddalar olib ketayotgan yuk poyezdining 50 ga yaqin vagoni relsdan chiqib ketdi, deb xabar bermoqda AP mahalliy hokimiyat vakillariga tayanib.

Voqea 3-fevral kuni kechki payt sodir bo‘lgan, ammo hodisa sabablari haligacha aniqlanmagan. Milliy transport xavfsizligi kengashi vakili Maykl Gremning bayonotiga ko‘ra, poyezd vagonlarining bir qismi relsdan chiqib ketganidan so‘ng ular alanga ichida qolgan.

“Yong‘in boshlangan paytga qaraganda hozir alanga biroz pasaygan, biroq yong‘in haligacha davom etmoqda, temiryo‘l relslari hamon to‘sib qo‘yilgan”, — dedi Grem.

AP materialiga ko‘ra, 100 dan ortiq vagondan 20 tasida zaharli va tez alanga oluvchi vinilxlorid moddasi bor — bu moddalar yonganda atrof-muhit uchun xavf tug‘diradi. Hozirda ekspertlar xavfli moddalar bo‘lgan vagonlarning qaysi biri shikastlanganini aniqlashga harakat qilmoqda.

Mahalliy o‘t o‘chirish rahbari Kit Drebikning aytishicha, vinilxlorid eng katta tashvish tug‘dirmoqda. Relsdan chiqqan vagonlarning kamida bittasida ushbu modda borligi aniq, biroq Drebik undagi xavfli moddaning sizib chiqishiga yo‘l qo‘ymaydigan mexanizmlar “hali ham ishlamoqda” deb ishontirdi. Drebik ta’kidlaganidek, favqulodda vaziyatlar ekipajlari bunday vagonlarga yaqinlashish va ularni o‘chirish xavfsiz ekaniga to‘liq ishonch hosil qilmaguncha masofani saqlab turadi.

“Bizga borib, yong‘inni o‘chirish vaqti keldi, deyishsa, yigitlarim kirib, yong‘inni o‘chirishadi”, — deb tushuntirdi o‘t o‘chirish boshlig‘i. Uning qo‘shimcha qilishicha, boshqa vagonlarda boshqa kimyoviy moddalar ham bo‘lgan, hozirda o‘t o‘chiruvchilar mahalliy va federal hokimiyatdan to‘liq ro‘yxatni kutishmoqda.

Hozircha qurbonlar va jabrlanganlar haqida ma’lumot yo‘q.