Ayni vaqtda prezident Shavkat Mirziyoyev Namangan shahrida biznes vakillari, tadbirkorlar bilan muloqot oʻtkazmoqda. Bu haqda “Daryo” muxbiri xabar berdi.
Prezident masʼullarga qator topshiriqlarni berdi. Jumladan, Bosh vazir oʻrinbosari Jamshid Qoʻchqorov, kambagʻallikni qisqartirish va bandlik vaziri Behzod Musayev, Namangan viloyati hokimi Shavkat Abdurazzoqovga bir haftada 500 ming aholi bandligi dasturini sektorlar kesimida taqsimlab, viloyatni “ishsizlikdan xoli hudud”ga aylantirish boʻyicha “yoʻl xarita”sini tasdiqlash topshirigʻi berildi.
Bosh vazir oʻrinbosari Jamshid Qoʻchqorov hamda qishloq xoʻjaligi vaziri Aziz Voitovga sektor rahbarlari va hokim yordamchilari bilan birga, 2023-yilda ajratiladigan 9,5 ming gektarda 67 mingta doimiy va 135 mingta mavsumiy ish oʻrinlari tashkil qilish topshirildi.
Kambagʻallikni qisqartirish va bandlik vaziri Behzod Musayev va iqtisodiyot va moliya vaziri Sherzod Qudbiyevga hokimlar va banklar bilan ishlab, xizmatlar sohasida 176 mingta ish oʻrni yaratish topshirigʻi berildi.
Bosh vazir oʻrinbosari Jamshid Xodjayev hamda investitsiyalar, sanoat va savdo vaziri Laziz Qudratovga viloyatda 1 mlrd dollarlik 1 mingta loyihani ishga tushirib, 45 ming yangi ish oʻrni tashkil qilish topshirildi.
Kasaba uyushmalari federatsiya raisi Qudratilla Rafiqov hamda bosh vazir oʻrinbosari Zulayho Mahkamovaga bir oy muddatda “mahallabay” hisob-kitob qilib, ayollarni kasb-hunarga oʻqitishi, ularni ish bilan taʼminlashi boʻyicha topshiriq berildi.
“Bunda, kamida 12 ming nafar ayolning farzandi yangi bogʻchalarga borishini inobatga olish, birinchi galda ularni ishlashi uchun sharoit qilib berish zarur”, — dedi davlat rahbari.
Iqtisodiyot va moliya vaziri Sherzod Qudbiyev maktabgacha va maktab taʼlimi vaziri Hilola Umarova bilan birga, 2023-yilda maktabgacha taʼlimda xususiy bogʻchalarni rivojlantirish uchun, viloyatga qoʻshimcha 50 milliard soʻm subsidiya ajratish topshirildi.
Yoshlar siyosati va sport vaziri Adham Ikramov hamda yoshlar siyosati va sport vazirining birinchi oʻrinbosari – Yoshlar ishlari agentligi direktori Alisher Saʼdullayevga 2023-yilda mehnat bozoriga kirib keladigan 20 ming Namanganlik yoshlar bilan manzilli ishlash topshirildi.
Shu bilan birga:
- “Yoshlar daftari” orqali viloyatdagi 23 ming nafar yoshlarga koʻmaklashishi;
- 8,5 ming nafariga kredit berib, ularni tadbirkor qilishi;
- 25 ming nafariga dehqonchilik uchun yer ajratishi;
- 16 ming nafarini boʻsh ish oʻrinlariga joylashtirishi zarur.
Izoh (0)