“Oʻzbekneftgaz” AJ: Ijtimoiy tarmoqlarda tarqalayotgan informatsion xurujlar boʻyicha rasmiy munosabat
Soʻnggi vaqtlarda ijtimoiy tarmoqlarda “Oʻzbekneftgaz” AJ (kelgusida - Jamiyat) imidjiga salbiy taʼsir qiladigan maʼlumotlar tarqatilmoqda. Internet tarmoqlar orqali ommaga tarqatayotgan maqolalar tuxmat, tashkilot rahbari shaxsini haqorat qilish va shu tariqa ushbu tashkilot imidjiga putur yetkazishga harakatdir.
Jamiyat faoliyatida shaffoflikni taʼminlash, korrupsiyani oldini olish maqsadida, Boshqaruv raisi Mehriddin Abdullayev boshchiligida gʻaznachilik tizimi joriy qilindi, komplayens nazorat mexanizmi yaratildi, xaridlar jarayoni ustidan koʻp bosqichli nazorat tizimi oʻrnatildi hamda jamiyat faoliyatini raqamlashtirish orqali inson omilini keskin kamaytirish boʻyicha ijobiy natijalarga erishildi.
Tizimda korrupsiyaga qarshi kurashish, komplayens nazorati yoʻnalishidagi xato-kamchiliklarni aniqlash va ularni kelgusida yoʻl qoʻyilishini oldini olishga qaratilgan kompleks chora-tadbirlarni amalga oshirish hamda Moliyaviy va komplayens nazorat departamenti va boshqa tegishli departament mutaxassislari hamkorlikdagi faoliyati natijasida 2021-2022-yillarda jami 421,6 mlrd soʻm qiymatidagi 52 ta oʻrganish hujjatlari huquqiy baho berish maqsadida huquqni muhofaza qiluvchi idoralarga taqdim etildi.
Xaridlar jarayonida shaffoflikni taʼminlash maqsadida, 2022-yilda 6 387 ta shartnomalar koʻrib chiqildi va 176 ta holatda 174,5 mlrd soʻmlik xato-kamchiliklar aniqlandi va ularni bartaraf etilishi taʼminlandi.
Jamiyat tasarrufidagi korxonalar rahbar va oʻrta boʻgʻim rahbarlaridan 5 043 ta manfaatlar toʻqnashuvi deklaratsiyalari olindi va ulardagi maʼlumotlar asosida 762 ta holatda qarindosh-urugʻchilik holatlari, 33 ta holatda Jamiyat xodimlarining boshqa korxonalar bilan aloqadorligi hamda 12 ta holatda Jamiyat xodimlarining kontragent hamda raqib korxonalarda yaqin qarindoshlari faoliyat olib borishi aniqlanib tegishli choralar koʻrildi.
Jamiyat tizimida faoliyat yuritayotgan 126 nafar xodim 191 holatda oʻzi rahbarligidagi (taʼsischiligi) korxonalar bilan 77,1 mlrd soʻmlik shartnomaviy munosabatlarga kirish orqali manfaatlar toʻqnashuviga yoʻl qoʻyilganligi aniqlandi va bartaraf etildi.
24 ta tizim korxonalari, boshqarmalari va neft bazalarida faoliyat olib borayotgan 29 415 ta xodimlarning 19 287 nafari (66 foiz), shundan 3 467 nafar (18 foiz) oʻrtasida elektron tarzda anonim soʻrovnomalar oʻtkazilib, aniqlangan salbiy holatlarni bartaraf etish choralari koʻrilmoqda.
Korxonalarda amalga oshiriladigan ishlar va vazifalardan kelib chiqib, yuzaga kelishi mumkin boʻlgan 326 ta boʻlinmalarni qamrab olgan holda jami 870 ta (shundan: 444 ta yuqori, 304 ta oʻrta va 122 ta past darajadagi)korrupsion xavf-xatarlar roʻyxati shakllantirildi hamda 677 ta tavsiyalar berilishi natijasida xavf xatarlar darajasi kamaytirilishiga erishildi.
Jamiyat tasarrufidagi UNG-Petro MCHJ hamda jamiyat boshqaruvi oʻrtasida munosabat amaldagi qonunchilik talablari doirasida yuritiladi va qatiy ravishda jamiyat manfaatlari himoya qilinadi. Shu bilan birga, UNG-Petro MCHJda tasarrufdagi barcha tashkilotlar singari komplayens nazorati tashkil etilgan boʻlib, har bir holatga qonunchilik doirasida tezkor ravishda munosabat bildiriladi. Murojaatda keltirilgan holat oʻz tasdigʻini topgan taqdirda, barcha zarur choralar koʻriladi va maʼlumotlar xuquqni muhofaza qiluvchi idoralarga taqdim etiladi.
Kelgusida ham “Oʻzbekneftgaz” AJ Boshqaruv raisi M. Abdullayev rahbarligidagi Ishchi guruh tomonidan korrupsiyaga qarshi kurashish, xato-kamchiliklarni oldini olish va bartaraf etish yuzasidan amaliy ishlar davom ettiriladi.
Yuqoridagilardan kelib chiqib, “Oʻzbekneftgaz” AJ ayrim ommaviy axborot vositalarining xabarlarini rad etgan holda, ularni chop etish va chop etishdan oldin tekshirishni, shuningdek, yolgʻon va ishonchsiz maʼlumotlarni tarqatganlik uchun respublika va xorijiy davlatlar qonunchiligida tegishli javobgarlik mavjudligini unutmaslikka chaqiradi.
“Oʻzbekneftgaz” AJ matbuot xizmati
