Andijonga mahallalarda ijtimoiy va ishlab chiqarish infratuzilmasini yaxshilash uchun 1,5 trillion soʻmga yaqin mablagʻ yoʻnaltiriladi
Ayni vaqtda prezident Shavkat Mirziyoyev Yangi Andijon tumanida viloyat faollari va masʼullar ishtirokida videoselektor yigʻilishini oʻtkazmoqda. Bu haqda “Daryo” muxbiri xabar berdi.
Davlat rahbari kambagʻallikni qisqartirish va aholi bandligini taʼminlash boʻyicha masʼullarga topshiriq berdi.
Xususan, ikki haftada Andijon viloyatini “ishsizlikdan xoli hudud”ga aylantirish boʻyicha sektorlar kesimida “yoʻl xaritalari” tasdiqlash topshirigʻi berildi. 2023-yilda bandligi taʼminlanadigan 470 ming aholini har bir sektor kesimida taqsimlanib, ijrosi nazoratga olinadi.
Bosh vazir oʻrinbosari Jamshid Qoʻchqorov hamda Qishloq xoʻjaligi vazirligiga tuman hokimlari va sektor rahbarlari bilan birga, 2023-yilda aholiga ajratiladigan 10 ming gektarda 75 mingta doimiy va 200 mingta mavsumiy ish oʻrinlari tashkil etish topshirildi.
Kambagʻallikni qisqartirish va bandlik vazirligi hamda Iqtisodiyot va moliya vazirligiga hokimlar va banklar bilan ishlab, xizmatlar sohasida 135 mingta ish oʻrni yaratish topshirigʻi berildi.
Shuningdek, Kambagʻallikni qisqartirish va bandlik vazirligi 2023-yilda 10 ming aholini kasb-hunarga oʻqitish va 1,5 ming nafariga mehnat qurollari uchun subsidiya ajratish topshirildi.
Bosh vazir oʻrinbosari Jamshid Xodjayev hamda Investitsiyalar, sanoat va savdo vazirligiga 2023-yilda viloyatda 800 million dollarlik 235 ta investitsiya loyihasini ishga tushirib, 40 ming yangi ish oʻrni tashkil qilish topshirildi.
Kasaba uyushmalari federatsiya hamda Bosh vazir oʻrinbosari Zulayho Mahkamovaga bir oy muddatda “mahallabay” hisob-kitob qilib, ayollarni kasb-hunarga oʻqitishi, ularni ish bilan taʼminlashi kerakli boʻyicha topshiriq berdi.
“Bunda, kamida 12 ming nafar ayolning farzandi yangi bogʻchalarga borishini inobatga olish, birinchi galda ularni ishlashi uchun sharoit qilib berish zarur. Buning uchun, Iqtisodiyot va moliya vazirligi hamda Maktabagacha va maktab taʼlimi vazirligi 2023-yilda xususiy bogʻchalarni rivojlantirish uchun, viloyatga qoʻshimcha 50 milliard soʻm subsidiya ajratsin”, — dedi davlat rahbari.
Yoshlar siyosati va sport vazirligiga 2023-yilda mehnat bozoriga kirib keladigan 55 ming andijonlik yoshlar bilan manzilli ishlash topshirildi. Shu bilan birga:
- “Yoshlar daftari” orqali viloyatdagi 23 ming nafar yoshlarga koʻmaklashishi;
- 17 ming nafariga kredit berib, ularni tadbirkor qilishi;
- 26 ming nafariga dehqonchilik uchun yer ajratishi;
- 11 ming nafarini boʻsh ish oʻrinlariga joylashtirishi zarur.
Mahallalarda ijtimoiy va ishlab chiqarish infratuzilmasini yaxshilash uchun, Andijonga jami 1,5 trillion soʻmga yaqin mablagʻ yoʻnaltirilmoqda. Shuningdek, “Ochiq budjet” doirasida mahallalar infratuzilmasiga qoʻshimcha 675 milliard soʻm ajratiladi.
