Hindistonlik milliarder dunyodagi eng boy odamlar o‘nligidan chiqib ketdi

Hindistonlik milliarder Gautam Adani o‘zining Adani Group konglomerati qiymatining keskin pasayishi tufayli dunyoning eng badavlat odamlari reytingida 4-o‘rindan 11-o‘ringa tushib ketdi. Bu haqda Bloomberg xabar berdi.

Agentlik ma’lumotlariga ko‘ra, so‘nggi uch kunlik savdolar davomida tadbirkor 34 milliard dollar yo‘qotgan, hozirda uning boyligi 84,4 milliard dollarga baholanmoqda.

Bloomberg’ning qayd etishicha, Adani hamon Osiyodagi eng boy odam.

Biroq Adani Group qiymatining pasayishi davom etsa, uni boshqa hindistonlik milliarder, raqib Reliance Industries rahbari Mukesh Ambani ortda qoldirishi mumkin.

Adani Group Hindistondagi eng yirik biznes guruhlardan biri bo‘lib, mamlakatdagi siyosiy va iqtisodiy hayotga ta’sir ko‘rsatadi.

Konglomerat Janubiy Osiyo mamlakatining energetika, qishloq xo‘jaligi va mudofaa sanoatida yetakchi o‘rinni egallaydi.

24-yanvar kuni Amerikaning Hindenburg Research tadqiqot va savdo kompaniyasi Adanini “o‘nlab yillar davomida qimmatli qog‘ozlar va buxgalteriya hisobidagi firibgarlik”da aybladi. Natijada Adani Group o‘tgan haftada 71 milliard dollar yo‘qotdi.