Oʻzbekistonda 2022-yilda tadbirkorlik, sanoat, qishloq xoʻjaligi va xizmat koʻrsatish sohalarida 2,7 million aholining doimiy daromadli ish bilan bandligi taʼminlandi. Bu haqda bosh vazir oʻrinbosari Jamshid Qoʻchqorov 31-yanvar kuni oʻtkazilgan Oliy Majlis qonunchilik palatasi majlisida maʼlum qildi.
Jamshid Qoʻchqorovning aytishicha, oʻtgan yili aholini ijtimoiy himoya qilish qamrovi 1,5 baravar ortgan.
“2022-yilda tadbirkorlik, sanoat, qishloq xoʻjaligi va xizmat koʻrsatish sohalarida 2,7 million aholining doimiy daromadli ish bilan bandligi taʼminlandi. Qariyb 4 milliondan ziyod aholi mavsumiy mehnat orqali daromad manbaiga ega boʻldi. Aholining ijtimoiy himoyaga muhtoj qatlamlariga davlat budjetidan jami 2,2 trillion soʻmlik bir martalik moddiy yordam koʻrsatildi. Mamlakatdagi 2,2 million nafar kam taʼminlangan oilalar uchun bolalar nafaqalari tayinlandi. 78 mingdan ortiq oilaga moddiy yordam koʻrsatildi. Buning hisobiga “Ijtimoiy himoya yagona reyestri” axborot tizimi orqali oilalarga moddiy yordam koʻrsatish qamrovi 2021-yilga nisbatan 1,5 baravar oshdi”, – dedi hukumat rasmiysi.
Jamshid Qoʻchqorovning qoʻshimcha qilishicha, Jahon banki ekspertlari bilan olib borilgan kuzatuvlarda Oʻzbekistondagi kambagʻallik darajasi 17 foizdan 14 foizgacha tushgani aniqlangan.
Avvalroq bosh vazir oʻrinbosari Oʻzbekiston aholisi topgan daromadining 40-50 foizini oziq-ovqat mahsulotlari xarid qilishga sarflashini aytgandi.
Izoh (0)