Joze Mourinyo: “Napoli”ni A Seriya g‘olibligi bilan tabriklayman
“Roma” bosh murabbiyi Joze Mourinyo A Seriya 20-turi doirasida “Napoli”ga qarshi kechadigan o‘yin oldidan o‘z fikrlarini bildirar ekan, hali chempionlik masalasini hal qilmagan nepolliklar klubini liga g‘olibligi bilan tabrikladi.
“Napoli”ni mavsumning birinchi kunidanoq ko‘rishga o‘rganib qolganimizdek darajada ko‘rishni kutyapmiz. Umid qilamanki, meni to‘g‘ri tushunishadi, “Napoli”ni chempionat g‘olibligi bilan tabriklayman. Skudetto — ularniki, “Napoli” sovrinni yutib bo‘ldi va bunga munosib.
Bu kuchli jamoa, ularda yaxshi murabbiy, juda zo‘r o‘yinchilar bor. Ular yozda yaxshi ishladi, hozir esa ajoyib harakat qilmoqda. Ular ikkinchi o‘rindan 12 ochko farqi bilan oldinda, chempionlik uchun kurashni istagan “Inter” bilan 13 ochkolik farq (20-tur oldidan shunday edi — izoh “Daryo”). Bu katta farq.
“Inter”, “Milan” va boshqa raqiblar yetti yoki sakkizta o‘yinni ketma-ket yutadigan darajada barqaror emas. Luchano jamoasi juda yaxshi ish olib bordi, ular sovrinni yutdi va jamoa bunga munosib.
Joze Mourinyo, “Roma” bosh murabbiyi
“Napoli” 19-turdan keyin eng yaqin ta’qibchisi “Inter”ni 10 ochkoga ortda qoldirmoqda. 29-yanvar kuni Luchano Spaletti shogirdlari “Roma”ga qarshi bahs olib boradi. O‘yin O‘zbekiston vaqti bilan 30-yanvarga o‘tar kechasi 00:45 da boshlanadi.
