Qo‘shimcha talab etiladigan 37,5 ming tonna piyoz 1-aprelga qadar ichki bozorlarga kiritiladi

AOKAda o‘tkazilgan brifingda Qishloq xo‘jaligi vazirligi Oziq-ovqat sanoati bosh boshqarmasi boshlig‘i o‘rinbosari Otajon Pirmonov ichki iste’mol bozoriga  piyoz mahsulotini kafolatli yetkazib berish, uning zaxirasi, yetishmaydigan qismini qoplash bo‘yicha amalga oshirilayotgan chora-tadbirlar haqida ma’lumot berdi.

Qayd etilishicha, qo‘shimcha talab etiladigan 37,5 ming tonna piyozni 1-aprelga qadar ichki bozorlarga kiritish chora-tadbirlari belgilangan.

23-yanvar kuni o‘tkazilgan monitoringlarda saralanmagan piyozning ulgurji narxlari o‘rtacha 6 500 so‘mni, dehqon bozorlaridagi arzonlashtirilgan maxsus rastalarda  5000 so‘mni, savdo markazlari va supermarketlarda 7 700 so‘mni tashkil etgan.

Mutaxassislar fikriga ko‘ra, mahsulot to‘liq nobud bo‘lishining oldini olish maqsadida ustki qismi muzlagan piyozni havo mo‘tadillashgunga qadar joyidan qo‘zg‘atmaslik kerak. 

“Yashil yo‘lak” tamoyili asosida o‘tgan 25 kunda jami 5 ming tonnna piyoz hududlararo intervensiya qilingan.

Intervensiya qilingan mahsulotlarning barchasi arzonlashtirilgan maxsus rastalar orqali departament organlari nazorati ostida narxlarni asossiz oshirmasdan sotilishi ta’minlab borilmoqda.