O‘zbekistonda iste’molchilarga to‘langan keshbeklar miqdori 773 milliard so‘mdan oshdi. Bu haqda Davlat soliq qo‘mitasi xabar bermoqda. 

Qayd etilishicha, 2022-yil dekabr oyi uchun 1,7 mln nafar iste’molchiga 127,4 mlrd so‘m keshbek to‘langan. Bu esa yil davomida qayd etilgan eng yuqori ko‘rsatkich.

Ma’lumotlarga ko‘ra, ayni paytda 1 milliondan ortiq fuqaroga 63,1 milliard so‘m to‘langan.

Noyabr oyida to‘lab berilgan keshbeklar miqdori 85,9 mlrd so‘mni tashkil qilgan. Sentabr oyida ham 1,2 mln nafar iste’molchiga 90,5 mlrd so‘m miqdorida keshbek to‘lab berilgan edi. Dekabr oyiga qadar bu rekord daraja bo‘lgan.

Belgilangan tartibga ko‘ra, dekabr oyi uchun iste’molchilarga 63,1 mlrd so‘m miqdoridagi naqd pul mablag‘lari tasdiqlandi. Naqd pulning qolgan qismi soliq deklaratsiyasi taqdim etilgandan so‘ng to‘lash uchun tasdiqlanadi.

2022-yilda 2 millionga yaqin iste’molchi 773 milliard so‘m keshbek oldi.

Avvalroq O‘zbekistonda onlayn kassalar orqali berilgan cheklarni tahrirlashga ruxsat berilgan edi.