BYD: endi rasman O‘zbekistonda!

Shu yilning 23-yanvar sanasida UzAuto va BYD kompaniyalari rasman Oʻzbekistonda yangi energiya manbalarida harakatlanuvchi avtomobillarni ishlab chiqarish va sotish bilan shugʻullanuvchi “BYD Uzbekistan Factory” MCHJ qoʻshma korxonasini roʻyxatdan oʻtkazdi.

“BYD Uzbekistan Factory” kompaniyasi, Xitoyning elektromobil ishlab chiqarishda giganti hisoblanuvchi BYD kompaniyasinig mamlakatdan tashqaridagi ilk hamkorlik loyihasi boʻldi. Bu, albatta, oʻzbek avtomobilsozligiga berilgan ijobiy baholardan biri hamdir.

Qoʻshma korxonaning asosiy yoʻnalishlari bu Oʻzbekistonga yangi energiya manbalarida harakatlanuvchi BYD avtomobillarini yetkazib berish, ishlab chiqarish va sotishdan iborat. Natijada yaqin kelajakda Oʻzbekistonda BYD avtomobillarini mahalliylashtirish maqsadida ishlab chiqarishga moʻljallangan toʻliq sikl ishga tushiriladi.

“BYD Uzbekistan Factory” elektromobillardan tashqari, Oʻzbekiston bozoriga BYD brendi ostidagi eng taniqli plug-in (PHEV) gibrid elektromobillarini ham olib kirmoqchi. Bu turdagi avtomobillar bitta zaryad va zapravka bilan 1 000 kilometrdan ortiq masofani bosib oʻta oladi.

Tez orada BYD elektromobillari, shu jumladan, gibrid elektromobillari rasmiy dilerlik markazlarida mijozlar uchun taqdim etiladi. Bu oʻz navbatida BYD elektromobillari egalari uchun yuqori malakali mutaxassislar rasmiy uskunalar va dasturiy taʼminotlar yordamida xizmat koʻrsatishini anglatadi. Haydovchilar ustalarni qidirish, proshivka masalasida bosh qotirmasligi kafolatlanadi, chunki avtomobillar toʻligʻicha oʻzbekistonliklar uchun moslashtirilgan boʻladi.

“BYD Uzbekistan Factory” kompaniyasi Oʻzbekistonda uch turdagi BYD modellarini taqdim etadi:

• BYD Chazor 05 DMi (gibrid)

• BYD Song Plus DMi (gibrid va elektromobil)

• BYD Han (elektromobil)

Tez orada Toshkent shahrida Avtomobillar sotuvi va sotuvdan keyingi xizmat koʻrsatish uchun ehtiyot qismlar, servis xizmatlarini koʻrsatuvchi dilerlik tizimi va stansiyalar tashkil etiladi. Bundan tashqari, oʻzbek, rus va ingliz tillarida ishlovchi ovozli yordamchi, interfeys va dasturiy taʼminot Oʻzbekistonda avtomatik tarzda doimiy yangilanib turiladi.

Albatta, xalqaro elektromobil ishlab chiqaruvchi liderning Oʻzbekistonga kirib kelishi oʻzbek avtomobil bozorida oʻz soʻzini aytmay qoʻymaydi, avtomobilni xarid qilmoqchi boʻlgan mijozlar yangi energiya manbalarida harakatlanuvchi avtomobillarning ustunlik tomonlarini oʻzida his etadi va avtomobillarni “qoʻldan” emas, kompaniyaning oʻzidan bemalol xarid qila oladi.

Kompaniya dilerlaridan yangi energiya manbalarida harakatlanuvchi avtomobillarni rasmiylashtirish orqali siz nafaqat uning toʻliq qulayligini his etasiz, balki ham arzonroq, ham kafolatlangan avtomobildan foydalanish imkoniyatini qoʻlga kiritasiz.

BYD – yangi energiya manbalarida (NEV) harakatlanuvchi transport vositalarini ishlab chiqarishda Tesla kompaniyasini ham ortda qoldirib, dunyo yetakchisi boʻlib turibdi.

Reklama huquqi asosida