Rossiyalik biznesmen Roman Abramovich va uning sheriklariga tegishli Britaniyaning Truphone telekommunikatsiya guruhi ikki yevropalik tadbirkorga 1 funt sterlingga sotildi. Bu haqda Financial Times xabar berdi.
Nashr ma’lumotlariga ko‘ra, kompaniyaning yangi egalari eski avtomobillar bilan shug‘ullanuvchi nemis tadbirkori Xakan Kox va uning biznes hamkori, avvallari telekommunikatsiya sohasi bilan bog‘liq bo‘lgan Pirros Kusios.
Britaniya OAVlari avvalroq yozganidek, kompaniya aktivlarining 90 foizi Koxga, 10 foizi esa Kusiosga o‘tishi kerak.
Truphone’ni sotish qarori Abramovichga Buyuk Britaniya va Yevropa Ittifoqi hukumatlari tomonidan kiritilgan sanksiyalar bilan bog‘liq.
Qayd etilishicha, u kompaniya aksiyalarining 23 foiziga egalik qilgan, qolgan ulushlarning katta qismi uning tog‘-metallurgiya kompaniyasidagi sheriklari Aleksandr Abramov va Aleksandr Frolovga tegishli bo‘lgan.
Bitim Buyuk Britaniya Biznes, energetika va sanoat strategiyasi vazirligi tomonidan bir necha oy davomida milliy xavfsizlik va investitsiyalar to‘g‘risidagi qonunga muvofiqligi bo‘yicha o‘rganilgan.
The Daily Telegraph nashrining yozishicha, Londonning asosiy tashvishi Koxning go‘yoki Rossiya bilan aloqasi borligi edi.
Financial Time maʼlumotlariga koʻra, Britaniya vazirligidan ruxsat oʻtgan oy olingan, oʻtgan hafta esa bitim uchun litsenziya Qirollik Moliya vazirligi qoshida faoliyat yurituvchi moliyaviy sanksiyalarni amalga oshirish idorasi tomonidan berilgan.
“Biz nihoyat ishga kirisha olamiz. Xodimlar uchun kompaniya yo‘nalishini bilmaslik juda og‘ir edi. Mijozlarimiz bizga juda sodiq bo‘lishdi va endi nihoyat ularga hamma narsa tayyorligini aytishimiz mumkin”, — deydi Kox.
Kompaniya haqida
Truphone eSim texnologiyasini ishlab chiqmoqda, bu sizga SIM-kartangizni almashtirmasdan turli provayderlarga ulanish imkonini beradi. Shuningdek, mobil telefonlarda xalqaro foydalanish uchun moslashuvchan ma’lumotlar rejalarini sotadi.
Avvalroq Britaniya OAVlari kompaniya qiymati yarim milliard funt sterlingga (hozirgi kurs bo‘yicha taxminan 615 million dollar) baholangani haqida yozgan edi.
Izoh (0)