Mikroto‘lqinli pechda o‘nlab taomlarni pishirish mumkin, lekin, qoida tariqasida, undan bitta maqsadda foydalanishadi: shunchaki ovqat isitish. Ammo mo‘jizaga boy shunday qulay oshxona gadjeti bo‘lsa, taom isitish bilan cheklanib bo‘ladimi? “Noviy ochag” nashri mikroto‘lqinli pechdan foydalanishda ko‘pchilikka noma’lum bo‘lgan qulayliklarni sanab o‘tdi.
Ko‘proq sharbat olish mumkin
Bu layfxak faqat limon bilan emas, balki barcha sitrus mevalari bilan ish beradi. Limon mikroto‘lqinli pechga qo‘yiladi, so‘ngra sharbati siqib ko‘riladi. Mevalar bu usulda ko‘proq sharbat beradi va buning uchun ortiqcha kuch sarflash shart emas. Faqat meva mikroto‘lqinli pechda uzoq vaqt qolmasligi kerak. Atigi 15 soniya yetarli bo‘ladi.
Qattiq qovoqni oson tozalash mumkin
Qovoq mikroto‘lqinli pechga 10 soniyaga qo‘yiladi, shunda po‘stini pichoq bilan tezroq tozalash mumkin. Qovoqcha, baqlajon va boshqa qattiq po‘stli sabzavotlarni ham shunday tozalash mumkin.
Piyozni ko‘z yoshlarsiz to‘g‘rab oling
Mikroto‘lqinli pechda 30 soniya davomida piyoz oldindan qizdiriladi. Issiqlik ko‘zning yoshlanishiga olib keladigan kimyoviy moddalarni parchalaydi. So‘ngra piyozni ko‘z yoshlarsiz to‘g‘rash mumkin.
Loviyani uzoq vaqt suvda ivitmasdan pishirish mumkin
Loviya, no‘xat, yasmiq kabi mahsulotlar uzoq vaqt suvda ivitishni talab qiladi. Xuddi shu jarayonni mikroto‘lqinli pech tezlashtirishga yordam beradi: loviya suvga solinadi, bir chimdim iste’mol sodasi qo‘shiladi va 7-10 daqiqa davomida pechga qo‘yiladi. Keyin pishirishdan oldin yana yarim soat suvda qoldiriladi.
Eskirgan nonni qayta yumshatish mumkin
Toza oshxona sochig‘i iliq suvga botirilib, non o‘raladi. Mikroto‘lqinli pechga 20 soniyaga qo‘yiladi, eskirgan non yana yumshaydi. Faqat nonni iliqligidayoq iste’mol qilish kerak, aks holda yana qattiq holatga kelib qoladi.
Asalni eritib olish mumkin
Asal eritib olish uchun mikroto‘lqinli pechga qo‘yiladi. O‘rtacha quvvatda 30-40 soniya davomida qizdiriladi. Aniq vaqt jihozning kuchiga va asal miqdoriga qarab farq qilishi mumkin. Keyin asal olinib, yaxshilab aralashtiriladi.
Lavlagini tezroq pishirish mumkin
Yuvilgan va tozalanmagan lavlagi paketga solinadi va mikroto‘lqinli pechda 15 daqiqa davomida qizdiriladi. So‘ngra olinib, paket ichida 5 daqiqa qoldiriladi.
Pomidorni osongina tozalash mumkin
Pomidorning po‘stini tozalash uchun ustiga qaynoq suv quyishga odatlanganmiz. Lekin buni tezroq bajarish mumkin. Buning uchun pomidor yuviladi. Pomidorning tagi kesib qo‘yiladi va suvli idishga solib, pechga qo‘yiladi. Suv bir zumda bug‘lanib, pomidorning po‘stini tozalashni osonlashtiradi.
Likop yoki krujkani isitib oling
Qimmatbaho restoranlarda ovqatni ko‘proq issiq turishi uchun isitilgan likopchalarda berilishini bilasizmi? Soviganda ta’mini yo‘qotadigan ba’zi taomlar uchun bu zarurdir. Agar krujka oldindan qizdirilsa, qahva va choy ham tezda sovib ketmaydi.
Yong‘oq va urug‘larni qovurish mumkin
Yong‘oqlar yuviladi va quritiladi, 5-6 daqiqa davomida maksimal quvvatda mikroto‘lqinli pechga qo‘yiladi. Davomiyligi yong‘oqlar miqdoriga bog‘liq: qancha ko‘p bo‘lsa, shuncha ko‘p vaqt talab etiladi. Yong‘oqlarni bir-ikki marta chiqarib, aralashtirish mumkin, shunda ular bir tekisda qovuriladi.
Ko‘katlarni quritish mumkin
So‘lib qolgan ko‘katlarni mikroto‘lqinli pechda bir necha daqiqada quritish mumkin. Biroz vaqt o‘tgach ularni idishlarga solib, javonlarda saqlash mumkin.
Kosmetik yog‘larni qizdirish mumkin
Soch yoki massaj uchun mo‘ljallangan yog‘ni ishlatishdan oldin biroz qizdirish tavsiya etiladi. Bunday holda idish mikroto‘lqinli pechda 20 soniya davomida qizdiriladi.
Qurib qolgan tushni yumshatish mumkin
Mikroto‘lqinli pech qurib qolgan tushni yumshatishga yordam beradi. Faqat qadoq oldindan tekshiriladi, u butunlay plastik bo‘lishi kerak. Tush qopqog‘i ochiladi va mikroto‘lqinli pechga qo‘yiladi va uning yoniga yarmi suv bilan to‘ldirilgan stakan qo‘yiladi. Kam quvvatda 30-40 soniya davomida qizdiriladi.
Oshxona sochiqlaridan yoqimsiz hidni ketkazish mumkin
Agar oshxona sochiqlari va salfetkalardan yoqimsiz hid kelsa, ular iliq suvda namlanadi, dog‘lar kir sovuni yoki limon kislotasi bilan yuviladi. So‘ngra paketga solinib, mikroto‘lqinli pechga qo‘yiladi. Yuqori quvvat yoqilib, 1,5-2 daqiqaga qoldiriladi. Pechdan sochiqlar ehtiyotkorlik bilan olib tashlanadi, sovuq suvda yuviladi va quritish uchun osib qo‘yiladi.
Idishlarni sterilizatsiya qilish mumkin
Har bir bankaga biroz qaynatilgan suv quyib, mikroto‘lqinli pechga 2-3 daqiqa qo‘yiladi. So‘ngra idishlar olinib, suv to‘kib tashlanadi va to‘liq quriguncha bankalar qog‘oz sochiqlar ustida qoldiriladi.
Izoh (0)