Braziliya Karlo Anchelottini olib kelmoqchi va uni 2023-yilning yoziga qadar kutishga tayyor
“Real” bosh murabbiyi Karlo Anchelotti Braziliya terma jamoasini boshqarishi mumkin.
Gazeta Esportiva xabariga ko‘ra, Braziliya futbol konfederatsiyasi (CBF) 63 yoshli mutaxassisni bosh murabbiy sifatida ish boshlashi uchun iyun oyiga qadar kutishga tayyor.
Italiyalik murabbiy hozircha rasmiy taklif olgani yo‘q, biroq CBF tez orada Anchelotti uchun aniq taklif ishlab chiqish bo‘yicha muzokaralarni faollashtiradi. CBF Anchelotti uchun iyun oyiga qadar kutishga rozi. Faqatgina Karlo bu ishga qiziqish bildirsagina rasmiy taklif yuboriladi.
Agarda Anchelotti 2023-yil iyun oyidan Braziliya terma jamoasini boshqarishga rozi bo‘lsa, unga qadar Braziliya tizimidan kimdir jamoani vaqtinchalik boshqarib turadi. Hozirda Braziliya U-20 jamoasini boshqarayotgan Ramon Menezes vaqtinchalik murabbiy bo‘lishi mumkin.
Italiyalik murabbiy ushbu taklifni rad etsa, braziliyalik mutaxassis terma jamoani boshqaradi. Eng asosiy nomzod “Fluminense” ustozi Fernando Diniza bo‘lib turibdi. Uning xizmatlarini futbolchilar va CBF yuqori baholaydi.
