Sirdaryo viloyati Yangiyer shahrida jome masjid qurilishi uchun yig‘ilgan pullar o‘zlashtirildi. Bu haqda Ichki ishlar vazirligi Kiberxavfsizlik markazi xabar qildi.
Qayd etilishicha, Yangiyer shahrida yashovchi M.S. ariza bilan murojaat qilib, shaharda qurilishi rejalashtirilgan masjid uchun ochilgan bank kartasi ma’lumotlarini ehson qiluvchilarga tarqatish uchun Telegram messenjerida e’lon qoldirganini ma’lum qilgan. E’londan so‘ng o‘zini Rossiya Federatsiyasida ishlovchi ayol sifatida tanishtirgan shaxs 150 dollar miqdoridagi pullarni ehson qilmoqchi ekanini bildirib, bank karta boshqaruvi uchun kelgan SMS-xabarni qo‘lga kiritish orqali mavjud 73 million 400 ming so‘m pullarni o‘zlashtirib olgan.
Olib borilgan tezkor-qidiruv tadbirlari natijasida ushbu jinoyatni Namangan viloyati Kosonsoy tumanida yashovchi E.A. (1996-yilda tug‘ilgan) va uning jinoiy sherigi Toshkent shahar Sergeli tumanida yashovchi N.J. (2002-yilda tug‘ilgan) sodir etgani aniqlangan.
Ularga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)