AQSH ma’muriyati o‘z fuqarolarining chet elda hibsga olinishlariga to‘sqinlik qilish uchun o‘zida mavjud vositalarni kengaytirdi. Bu haqda Oq uy matbuot kotibi Karin Jan-Pyer ma’lum qildi. Xususan, Vashington bunday “g‘ayriqonuniy hibslar”ga aloqador shaxslarga nisbatan sanksiyalar kiritish bilan tahdid qildi.
Brifing chog‘ida Jan-Pyer ma’lum qilishicha, AQSH hukumati amerikaliklarning hibsga olinishi bilan bog‘liq muammoni hal qilish uchun hukumat qo‘llashi mumkin bo‘lgan vositalar majmuini kengaytirgan. Uning aniqlik kiritishicha, gap hibslarga aloqador “rasmiy va norasmiy shaxslarga sanksiyalar va vizalar berishga taqiq kabi jiddiy xarajatlar va oqibatlar” haqida bormoqda.
“Shuningdek, Davlat departamenti o‘zining safarlar bo‘yicha tavsiyalariga AQSH fuqarolarini muntazam ravishda bunday amaliyotdan foydalanadigan oltita mamlakatda g‘ayriqonuniy hibs xavfi haqida ogohlantiruvchi yangi ko‘rsatkich kiritdi”, — deya qo‘shimcha qildi matbuot kotibi.
Gap qaysi mamlakatlar haqida borayotganiga aniqlik kiritilmadi. Yangi ko‘rsatkichni Davlat departamenti iyunda joriy qilgandi. AQSH fuqarolari uchun noqonuniy qo‘lga olinish xavfi bo‘lgan mamlakatlar D indikatori bilan belgilanadi. Idora saytida bunday ko‘rsatkich Rossiya, Eron, Venesuela va Shimoliy Koreyada bor.
Eslatib o‘tamiz, 8-dekabr kuni Moskva va Vashington rossiyalik Viktor Butni amerikalik basketbolchi Brittni Graynerga ayirboshladi. But 2012-yilda qurol savdosi uchun AQSHda 25 yillik koloniyaga hukm qilingandi. Grayner esa avgustda yonidan nasha yog‘i topilgani uchun to‘qqiz yilga hukm qilingandi.
Izoh (0)