Navoiy viloyati Tomdi tumanida fuqaro marmar koniga niqob taqib kirib, bosqinchilik sodir etdi. Bu haqda Tergov departamenti axborot xizmati xabar berdi.
Qayd etilishicha, 28-noyabr kuni soat 23:00 da noma’lum shaxs o‘zganing mol-mulkini bosqinchilik yo‘li bilan qo‘lga kiritish maqsadida yuziga qora rangli niqob kiygan holda Tomdi tumani hududida faoliyat olib borayotgan qo‘shma korxonaning marmar koni qorovulxonasiga bostirib kirgan.
Shu yerda korxona qorovuli — 55 yoshli R.U.ga hujum qilib, uning yuz qismiga urib, qo‘llarini arqon bilan bog‘lab, korxona omborxonasi qulfini buzish yo‘li bilan ochgan. So‘ng umumiy qiymati 4 million so‘mlik 35 millimetr diametrli, uzunligi 50 metr bo‘lgan mis kabellarini bosqinchilik yo‘li bilan olib, hodisa joyidan yashiringan.
Olib borilgan tergov-tezkor ishlar natijasida “Yangi Zarafshon” MFYda yashovchi, tumanda joylashgan o‘rta maktablarning birida qorovul bo‘lib ishlovchi 30 yoshli K.A. yuziga niqob kiygan holda, davlat raqam belgisi bo‘lmagan “Ural” mototsiklida korxonaning hududiga kelib, mazkur jinoyatni sodir qilgani aniqlanib, ushlangan.
Holat yuzasidan Jinoyat kodeksning 164-moddasi 3-qismi “v” bandi (bosqinchilik) bilan jinoyat ishi qo‘zg‘atilgan. Hozirda yuqoridagi shaxs nima sababdan ushbu jinoyatga qo‘l urgani aniqlanmoqda.
Izoh (0)