Samarqand aeroporti noqulay ob-havo tufayli vaqtincha yopilgani haqida xabar berilgan edi. Uzbekistan Airports matbuot xizmati holat yuzasidan rasmiy ma’lumot berdi.
Qayd etilishicha, 5-dekabr kuni soat 4:20 dan ob-havo sharoiti yomonlashgani sababli Samarqand xalqaro aeroportida samolyotlarni qabul qilish va jo‘natishda vaqtinchalik cheklov joriy etildi. Shu sababli “Aeroflot”ning Moskva—Samarqand yo‘nalishi bo‘yicha reysi, Turkish Airlines’ning Istanbul—Samarqand reysi Toshkentdagi muqobil aeroportga yo‘naltirildi.
Fly Dubai aviakompaniyasining reysi ob-havo yomonlashgunga qadar — mahalliy vaqt bilan 03:07 da Samarqand aeroportiga qo‘nishga muvaffaq bo‘lgan. Biroq samolyotning yetib kelishi kechikkanligi sababli Samarqanddan uchish vaqti soat 16:15 ga kechiktirildi.
Ob-havo sharoitidan kelib chiqib, samolyotlarni qabul qilish va jo‘natish bo‘yicha cheklovlarni mahalliy vaqt bilan soat 13:00 gacha uzaytirish to‘g‘risida qaror qabul qilindi.
“Hozirda aeroport xodimlari barcha zarur choralarni ko‘rmoqda — bir necha soat davomida uchish-qo‘nish yo‘lagi va yurish yo‘laklarini maxsus texnika va kimyoviy vositalar yordamida tozalash ishlari olib borilmoqda”, — deyiladi xabarda.
Izoh (0)