Toshkent viloyatida er-xotin va ularning uch oylik chaqalog‘i is gazidan vafot etdi

Toshkent viloyatining Chinoz tumanida er-xotin va ularning uch oylik chaqalog‘i is gazidan zaharlanib vafot etdi. Bu haqda “Daryo”ga Bosh prokuratura matbuot xizmati xabar berdi.

Chinoz tuman Ichki ishlar bo‘limi navbatchilik qismining 4-dekabr kuni soat 09:00 larda bergan xabariga ko‘ra, shu kuni soat 07:00 larda Chinoz tumani, Istiqlol ko‘chasidagi uyda yashovchi erkak B.Y., ayoli S.U. va ularning 2022-yilning sentabrida tug‘ilgan qizi S.Y. yashash xonadonining yotoqxonasida uxlayotganida is gazidan zaharlanib vafot etgan.

Olib borilgan tergovga qadar tekshiruv harakatlari davomida aniqlanishicha, xonadonning foydalanilgan tabiiy gazdan 7,5 million so‘m debitor qarzdorligi mavjud bo‘lgan. Shu sababli 3-dekabr kuni gaz ta’minoti bo‘limi xodimlari tomonidan gaz tarmog‘idan payvandlash yo‘li orqali uzilgan. Biroq xonadon egasi o‘zboshimchalik bilan tabiiy gaz tarmog‘iga ulanib, foydalanib kelgan.

Holat yuzasidan tayinlangan sud-tibbiyot ekspertizasining 4-dekabrdagi dastlabki ma’lumotnomasiga ko‘ra, 28 yoshli B.Y., uning 20 yoshli ayoli S.U. va ularning uch oylik qizi S.Y. tashqi ko‘rik vaqtida tan-jarohatlari aniqlanmagan. Ularning o‘limiga yonib ulgurmagan is gazidan zaharlanish oqibatida o‘tkir yurak-qon tomir va o‘pka-nafas yetishmovchiligi natijasida sodir bo‘lishi mumkinligi aniqlangan.