O‘zbekistonda 2022-yilning dekabri nisbatan sovuq havo bilan boshlandi. Bu oyda ob-havo haqiqatan ham qishki bo‘ladimi yoki so‘nggi yillarda dekabrda kuzatilayotgan iliq darajali ob-havo hukm suradimi? “O‘zgidromet” bu boradagi prognozini e’lon qildi.
Unga ko‘ra, 1-dekabrdan haroratning pasayishi boshlandi va 3—5-dekabrga kelib respublika hududining katta qismida kechalari 4-7 daraja sovuqqacha, kunduz kunlari 0-3 daraja iliqqacha, ba’zi joylarda 1-2 daraja sovuqqacha, shimolda kechalari 10-13 daraja sovuqqacha, kunduz kunlari 4-7 daraja sovuqqacha pasayadi.
Hatto respublikaning eng janubiy qismida ham sovuq bo‘ladi, harorat kechalari 0-2 daraja sovuqqacha, kunduz kunlari 3-6 daraja iliqqacha pasayadi. Sovuq ob-havo deyarli dekabr oyining birinchi o‘n kunligi oxirigacha saqlanib turadi.
Respublika bo‘yicha 5-dekabrgacha quruq ob-havo bo‘lishi kutilmoqda. 5—10-dekabr kunlari davrida respublikaning markaziy va janubi-sharqiy hududlari bo‘yicha ayrim kunlarda qor ko‘rinishidagi yog‘ingarchilik bo‘lishi mumkin.
Dekabrning ikkinchi va uchinchi o‘n kunliklarida me’yoriy qiymatlarga yaqin bo‘lgan fonda havo harorati kechalari 2-7 daraja iliqdan 2-7 daraja sovuqqacha, kunduz kunlari 10-15 daraja iliqdan 2 daraja sovuq-3 daraja iliqqacha o‘zgarib turishi kutilmoqda.
Qayd etilishicha, 2021-yilning dekabr oyi oxirgi 20 yil ichida eng iliq yil bo‘ldi. Ushbu davr uchun 2002, 2011 va 2020-yillarning dekabr oylari esa eng sovuq bo‘lgan.
Izoh (0)