Krishtianu Ronaldu Saudiya Arabistoni klubiga o‘tishga yaqin. Hujumchi klubda har mavsum 200 million yevro ishlab topadi

Krishtianu Ronaldu Saudiya Arabistonining “An-Nassr” jamoasiga o‘tishga yaqin.

Marca nashrining xabariga ko‘ra, hujumchi arab jamoasi bilan 2,5 yillik shartnoma imzolaydi. “An-Nassr”da o‘tkazgan har bir mavsumi uchun Krishtianu 200 million yevro ishlab topadi. Buning ichiga futbolchining maoshi va reklama daromadlari ham kiritilgan.

Ronaldu kuchsizroq ligaga o‘tish uchun o‘zining sport ambitsiyalarini kamaytirishga rozi. Yevropaning hech qaysi jamoasi “An-Nasr” berishga tayyor bo‘lgan shartnomaga teng keladigan taklif kiritmagan. Portugaliyalik futbolchiga MLSdan ham kattaroq taklif kelib tushmagan.

Saudiya Arabistoni Ronalduning “An-Nassr”ga o‘tishi mamlakat va undan tashqarida futbolni ommalashtirishga yordam beradi deb hisoblamoqda.

Eslatib o‘tamiz, yaqinda Ronalduning “Manchester Yunayted” bilan shartnomasi bekor qilingan edi. Hozirda forvard erkin agent maqomida.

Portugaliya bilan Krishtianu Ronaldu JCH—2022 H guruhida 6 ochko jamg‘arib, pley-off yo‘llanmasini qo‘lga kiritdi.