Joriy yilning yanvar—oktabr oylaridagi O‘zbekistonning MDH mamlakatlari bilan savdo aylanmasi qanday bo‘lgani ma’lum qilindi. Bu haqda “Daryo”ga Iqtisodiy tadqiqotlar va islohotlar markazi xabar berdi.
2022-yilning yanvar—oktabr oylarida O‘zbekiston tashqi savdo aylanmasining uchdan bir qismi yoki 39,6 foizi MDH davlatlariga to‘g‘ri keldi.
Shu bilan birga, yil boshidan beri MDH davlatlarining umumiy tashqi savdo aylanmasidagi ulushi 2021-yilning mos davriga nisbatan 1,5 foizga oshdi. Boshqa xorijiy davlatlar ulushi esa mos ravishda 1,5 foizga kamayib, 60,4 foizni tashkil etdi.
O‘zbekistonning MDH mamlakatlari bilan tashqi savdo aylanmasi 2022-yil yanvar—oktabr holatiga ko‘ra 27 foizga o‘sib, 15,9 mlrd dollarni tashkil etdi.
Shundan eksport — 45,9 foizga o‘sib, 6,4 mlrd dollar, import esa — 16,8 foizga o‘sib, 9,5 mlrd dollar qiymatida qayd etildi.
MDH mamlakatlari bilan tashqi savdo aylanmasining eng yuqori hajmlari Rossiya (47 foiz), Qozog‘iston (23 foiz) hamda Qirg‘iz Respublikasi (6 foiz) davlatlari bilan qayd etildi.
Avvalroq O‘zbekiston Markaziy Osiyoning qaysi davlatlari bilan eng ko‘p savdo qilayotgani ma’lum qilingandi.
Izoh (0)