Amerikaliklar yaqinlashib kelayotgan bayramlar uchun kamroq sovg‘alar sotib olishni, shuningdek, mamlakatdagi inflyatsiya va iqtisodiy muammolar tufayli xayriya xarajatlarini kamaytirishni rejalashtirmoqda. Bu haqda ijtimoiy so‘rovnomalarga tayanib The Wall Street Journal (WSJ) xabar berdi.
Ma’lumotlar AQSHda iste’molchilar va korxonalar sovg‘alar, xayriya mablag‘lari va bayram tadbirlari uchun sarf-xarajat rejalarini qisqartirganini ko‘rsatadi, — deya ta’kidlaydi nashr.
Bankrate tomonidan avgust oyida o‘tkazilgan so‘rov natijalariga ko‘ra, respondentlarning 84 foizi bu yil kuponlar va chegirmalarga tayanib, shuningdek, kamroq narsalarni sotib olib, arzonroq sovg‘alarni izlash orqali pulni tejashlarini aytishgan.
Sentabr oyida Deloitte konsalting kompaniyasi tomonidan o‘tkazilgan so‘rovga ko‘ra, amerikaliklar yaqinlashib kelayotgan bayramlar uchun o‘rtacha to‘qqizta sovg‘a sotib olishni reja qilmoqda, bu o‘tgan yilgidan yettitaga kam.
Gazetaning yozishicha, AQSH aholisi xayriya ishlariga sarflanadigan mablag‘ni ham kamaytirgan.
Kiva kraudfanding platformasi 2 000 amerikalik o‘rtasida so‘rov o‘tkazdi va ularning ko‘pchiligi o‘tgan yilga nisbatan xayriya ishlariga kamroq mablag‘ ajratishni rejalashtirayotganini ma’lum qildi.
15-noyabr kuni AQSH moliya vaziri Janet Yellen Indoneziyadagi G20 sammiti arafasida AQSH inflyatsiyasi taxminan ikki yil ichida normal darajaga tushishini ma’lum qilgan.
10-noyabr kuni AQSH Mehnat departamenti mamlakatda iste’mol narxlari oktabr oyida yillik hisobda 7,7 foizga oshganini ma’lum qildi.
Izoh (0)