Turkiyaning yangi talablari Rossiya neft eksportiga to‘sqinlik qilishi kutilmoqda

1-dekabrdan boshlab Turkiya xom neft tashuvchi tankerlarga bo‘g‘ozlardan o‘tishi uchun qo‘shimcha shart joriy qilmoqda. Bu haqda Turkiya transport vazirligiga tayanib, Bloomberg yozmoqda.

Bosfor va Dardanel yo‘li orqali neft eskport qiladigan kemalar sug‘urta mavjudligini isbotlashlari kerak. Bu tankerlarning rossiya nefti bilan yo‘llardan o‘tishini to‘sib qo‘yishi mumkin.

Yangi talablarga muvofiq, neft tashuvchi kemalarda sug‘urta kompaniyasining xati bo‘lishi kerak, bu kemada P&I sug‘urtasi (“himoya va kompensatsiya”) mavjudligini tasdiqlaydi. 

Ushbu sug‘urta shakli Anqaraga kemalarning ekspluatatsiyasi vaqtida atrof-muhitga, yuklarga yoki uchinchi shaxslarga zarar yetkazilgan taqdirda o‘z javobgarligini va jarimalarini qoplash imkonini beradi.

Turkiya Transport vazirligining ta’kidlashicha, agar kemalar bo‘g‘ozlardan sug‘urtalanmagan holda o‘tib ketsa, suv yo‘llariga katta zarar yetkazilishi mumkin. 

Bundan tashqari, agar sug‘urtalanmagan kema avariyaga uchrasa, bo‘g‘ozdagi barcha kemalarning harakati to‘xtatilishi mumkin.

Agentlikning qayd etishicha, yangi talablar Rossiyadan neft yetkazib berishni cheklashi mumkin, chunki Yevropa Ittifoqi (YI) va Buyuk Britaniyaning Rossiya bilan savdoga qo‘ygan qo‘shimcha cheklovlari ham dekabr oyida kuchga kiradi.

AQSH va Buyuk Britaniya Rossiyaning Ukrainadagi harbiy harakatlari tufayli mart oyida Rossiya nefti va neft mahsulotlariga embargo qo‘ygan edi. 

Shundan so‘ng YI 5-dekabrgacha Rossiyadan dengiz orqali neft yetkazib berishni ta’qiqlashga qaror qilgandi. 

4-noyabr kuni G7 davlatlari va Avstraliya nihoyat Rossiya neftiga qat’iy narx belgilashga kelishib oldi. 

Noyabr oyi oxirigacha narx chegarasini belgilash rejalashtirilgan. Rossiya energiya resurslarini cheklangan narxlarda etkazib berishdan bosh tortgan.

Jahon tankerlarini sug‘urtalash bozorining 90 foizdan ortig‘i P&I Clubs International Group sug‘urta kompaniyalari assotsiatsiyasiga to‘g‘ri keladi. 

Kompaniya Yevropa qonunchiligiga bo‘ysunadi. 5-dekabrdan boshlab esa YI va Buyuk Britaniya, agar sotilgan Rossiya neftining narxi shiftdan yuqori bo‘lsa, transport va sug‘urta xizmatlarini ko‘rsatishni taqiqlaydi.