Rossiya Federatsiya Kengashining Iqtisodiy siyosat qo‘mitasi rahbari Andrey Kutepov Ukrainadagi harbiy amaliyotlar boshlanganidan so‘ng mamlakatni tark etgan Rossiyadagi yirik tadbirkorlar va davlat korporatsiyalari rahbarlarining aktivlarini muzlatib qo‘yishni taklif qildi.
U o‘z g‘oyasini bosh vazir o‘rinbosari Dmitriy Grigorenkoga yuboriladigan maktubda bayon qildi.
Maktubda aytilishicha, G‘arb davlatlari rossiyalik milliarderlarning mol-mulkini qanday tortib olayotgan bo‘lsa, 24-fevraldan keyin Rossiyani tark etganlar va mamlakat fuqaroligidan voz kechganlarga nisbatan ham xuddi shunday choralar ko‘rish maqsadga muvofiqdir.
Senator harbiy amaliyotni moliyalashtirish uchun mamlakatdan maqsadli hisob raqamiga chiqib ketgan tadbirkorlarga tegishli dividendlar va boshqa to‘lovlarni olish masalasini ko‘rib chiqishga chaqirdi.
Kutepovning fikricha, o‘z vatanini tark etgan norentabel rivojlanish institutlari yoki davlat korporatsiyalari rahbarlarining mol-mulki va aktivlarini boshqarishdan olingan daromadlar ushbu tashkilotlar zararini qoplash uchun maqsadli ravishda budjetga tushishi kerak.
Mavjud sharoitda 24-fevraldan keyin mol-mulk, aksiyalar, qimmatli qog‘ozlar bilan tuzilgan bitimlar bo‘yicha qo‘shimcha soliq hisoblash bo‘yicha muvozanatli qaror qabul qilinadi. Stavka tranzaksiya summasining 30-50 foizini tashkil qilishi mumkin, — deyiladi xatda.
Andrey Kutepov, shuningdek, Rossiyada muzlatib qo‘yilgan do‘stona davlatlardan kelgan xorijiy investorlarning mablag‘larini Qrim ko‘prigi, yo‘llar va maxsus operatsiya zonasidagi kommunal infratuzilmani ta’mirlashga yo‘naltirishni taklif qildi.
Tadbirkor Oleg Tinkov oktabr oyida Rossiya fuqaroligidan voz kechishini ma’lum qilgandi.
Avvalroq Revolut asoschisi Nikolay Storonskiy, DST Global fondi asoschisi Yuriy Milner, “Troyka Dialog” asoschisi Ruben Vardanyan va Freedom Finance asoschisi Timur Turlov Rossiya pasportidan voz kechishga qaror qilgan edi.
Izoh (0)