Ilk bor O‘zbekistonning 8 ta oliy ta’lim muassasasi top-1000 talikdagi Osiyoning eng kuchli universitetlari ro‘yxatiga kiritildi, deb xabar bermoqda Oliy va o‘rta maxsus ta’lim vazirligi matbuot xizmati.
Ma’lum qilinishicha, Quacquarelli Symonds xalqaro reyting tashkiloti Osiyo Universitetlarining 2023-yil uchun reyting (QS Asia University Rankings 2023) natijalarini e’lon qildi. Unga ko‘ra, ilk bor O‘zbekistonning 8 ta oliy ta’lim muassasasi top-1000 talikdagi Osiyoning eng kuchli universitetlari ro‘yxatiga kiritildi.
Xalqaro reyting tuzuvchi tashkilot Quacquarelli Symonds’ning bu yilgi reytingi bugungi kunga qadar eng kattasi hisoblanib, o‘z ichiga 760 ta eng kuchli Osiyo universitetlarini qamrab olgan. Shuningdek, reytingni shakllantirishdagi asosiy ko‘rsatkichlar sifatida akademik va ish beruvchining obro‘si, PhD darajasiga ega bo‘lgan xodimlar soni hamda xalqaro talabalar ulushi kabi me’zonlar birinchi marotaba kiritildi.
QS Asia University 2023 reytingida Osiyo qit’asidagi universitetlar joylashuviga qarab mintaqaviy o‘rinlari ham belgilangan bo‘lib, mamlakatimizning yuqoridagi 8 ta oliy ta’lim muassasasi QS Markaziy Osiyo Universitetlar Reytingida ham munosib o‘rinlarni egalladi.
QS Asia University Rankings reytingini tuzishda OTMning quyidagi 11 ta ko‘rsatkichi baholanadi:
- ilmiy (akademik) obro‘ (professor-o‘qituvchilarning ovozi) — 30 foiz;
- ish beruvchining bahosi — 20 foiz;
- professor-o‘qituvchilar/talabalar nisbati — 10 foiz;
- xalqaro tadqiqot tarmog‘i (Scopus’dagi maqolalar soni) — 10 foiz;
- bitta maqolaga berilgan iqtiboslar — 10 foiz;
- har bir professor-o‘qituvchi hissasiga to‘g‘ri keladigan maqolalar soni — 5 foiz;
- PhD darajasiga ega xodimlar soni — 5 foiz;
- xalqaro professor-o‘qituvchilarning ulushi - 2,5 foiz;
- chet ellik talabalarning ulushi — 2,5 foiz;
- almashinuv dasturlari doirasida xorijdan kelgan talabalarning ulushi — 2,5 foiz;
- xorijga borgan talabalarining ulushi — 2,5 foiz.
Izoh (0)