Bandlik va mehnat munosabatlari vazirligi mas’ullari 21-oktabr O‘zbek tiliga davlat tili maqomi berilgan kun munosabati bilan tadbir tashkil qilib, tilchilarga tojik tilidagi kitoblarni sovg‘a qilishi jamoatchilik muhokamasiga sabab bo‘lmoqda. Bu haqda Telegram’dagi Qitmir muxbir kanali xabar berdi.

Ma’lum bo‘lishicha, vazirlik mas’ullari 21-oktabr O‘zbek tiliga davlat tili maqomi berilgan kun munosabati bilan 20-oktabr kuni tadbir tashkillashtirib, “o‘zbek tilida to‘g‘ri va ravon so‘zlashish madaniyatini yuksaltiraylik, tilimizni rivojlantiraylik”, deya tadbirning iqtidorli ishtirokchilariga tojik tilida yozilgan kitob sovg‘a qilgan.

Tilimiz hurmati uchun o‘zbek tilida yozilgan kitoblar topish imkoni bo‘lmadimikin? Yoki vazirlikning shu masalaga mas’ullarining tili boshqa-yu, dili boshqami?, — deydi bu haqda yozgan Qitmir muxbir.

Facebook foydalanuvchilaridan biri bu holatni kulgiga olib, “kitoblarni arzonroqqa olishgandir-da”, desa, yana biri “Aytamanku qadring bo‘lmasa-da, qadding baland bo‘lsin ona tilim deb”, deydi. Yana boshqasi esa vazirlik mas’ullarini farosatsizlikda ayblaydi. Jurnalist Mirolim Isajonov esa mazkur holatga Ma’naviyat va davlat tilini rivojlantirish masalalari departamentining e’tiborini qaratgan.

Vazirlik mazkur holatni hozircha izohlamagan.

Avvalroq O‘zbekiston xalq shoiri Usmon Azim jamiyatda savodsizlik avj olgani haqida gapirib, “O‘zbekka nihoyatda achinyapman” degani xabar berilgandi.