Oliy Majlis Qonunchilik palatasining navbatdagi yalpi majlisida “Hayvonot dunyosini muhofaza qilish va undan foydalanish to‘g‘risida”gi O‘zbekiston Respublikasi qonunining 43-moddasiga o‘zgartishlar va qo‘shimchalar kiritish haqida”gi qonun loyihasi ham ko‘rib chiqildi. Bu haqda Davlat ekologiya qo‘mitasi xabar qildi.
Qayd etilishicha, qo‘mita tomonidan ishlab chiqilgan ushbu qonun loyihasida yovvoyi hayvonlarni aholi turar joylarida saqlashda fuqarolar hayoti va sog‘lig‘ini muhofaza qilish, ular bilan bog‘liq noxush holatlarning oldini olish, qonunchilik hujjatlari o‘rtasidagi tafovutlarni bartaraf etish, sohadagi ruxsat berish tartib-taomillarini samarali tartibga solish masalalari ko‘zda tutilgan.
So‘nggi vaqtlarda fuqarolar tomonidan inson hayotiga xavf tug‘diruvchi yovvoyi hayvonlarni xonadonlarda saqlash, ularni jamoat joylarida sayr qildirish, shuningdek to‘y, ma’raka, yubiley hamda boshqa oilaviy tadbirlarda olib yurish holatlari ortib borayotgani natijasida joylarda noxush holatlar qayd etilmoqda.
Bunday holatlarning oldini olish maqsadida “Hayvonot dunyosini muhofaza qilish va undan foydalanish to‘g‘risida”gi O‘zbekiston Respublikasi qonunining 43-moddasiga bir qator qo‘shimcha va o‘zgartishlar kiritish taklif etilmoqda.
Birinchidan, uchinchi va to‘rtinchi qismlardagi “ruxsatnoma” so‘zi amaldagi “Litsenziyalash, ruxsat berish va xabardor qilish tartib-taomillari to‘g‘risida”gi O‘zbekiston Respublikasining qonuniga muvofiq “guvohnoma” so‘ziga almashtirilmoqda.
Ikkinchidan, quyidagi mazmundagi beshinchi qism bilan to‘ldirilmoqda:
“Jismoniy shaxslar tomonidan yarim erkin sharoitlarda, sun’iy yaratilgan yashash muhitida yoki tutqunlikda saqlanishi taqiqlangan yovvoyi hayvonlarning ro‘yxati, shuningdek mazkur ro‘yxatga kiritilgan yovvoyi hayvonlarning yuridik shaxslar tomonidan saqlanishi tartibi O‘zbekiston Respublikasi Vazirlar Mahkamasi tomonidan belgilanadi”.
Uchinchidan, oltinchi qismida yarim erkin sharoitlarda, sun’iy yaratilgan yashash muhitida yoki tutqunlikda saqlanayotgan yovvoyi hayvonlarni tabiiy muhitga Ekologiya va atrof-muhitni muhofaza qilish davlat qo‘mitasining vakillari ishtirokisiz o‘zboshimchalik bilan chiqarib yuborishni taqiqlash nazarda tutilgan.
Qonun loyihasini ishlab chiqish mobaynida xorijiy davlatlar tajribasi o‘rganilgan, tegishli vazirlik va idoralar bilan kelishilgan.
Shuningdek, loyiha belgilangan tartibda Normativ-huquqiy hujjatlar loyihalari muhokamasi portali (regulation.gov.uz)da jamoatchilik muhokamasidan va Adliya vazirligining huquqiy ekspertizasidan o‘tkazilgan.
Qonun loyihasi yovvoyi hayvonlarni saqlash, ularni tabiiy muhitga chiqarib yuborish, ulardan jamoat joylarida foydalanish bilan bog‘liq hollarda aholining hayoti va sog‘lig‘ini muhofaza qilishga xizmat qiladi.
Majlisda qonun loyihasi deputatlar tomonidan birinchi o‘qishda qabul qilindi.
Izoh (0)