Buxoro viloyatining G‘ijduvon tumanida 29 yoshli o‘g‘il 51 yoshda bo‘lgan onasini pichoqlab o‘ldirgani xabar berilgandi. Bosh prokuratura axborot xizmati rahbari Hayot Shamsutdinovning “Daryo”ga qo‘shimcha ma’lumot berishicha, voqea 2-oktabr kuni emas, 2022-yilning 28-sentabr kuni soat taxminan 19:43 da sodir bo‘lgan.
“G‘ijduvon tumanida yashovchi H.N. onasi M.O. bilan yashash uyiga begona erkaklarni olib kelmaslik masalasida o‘zaro tortishib, janjal qilgan. Janjal paytida o‘g‘il oshxona pichog‘ida onasining chap yelka yuqori qismi, ko‘krak qafasi va qo‘ltiq osti sohasiga bir martadan, jami uch marotoba urib, qasddan o‘ldirgan. Sud tibbiy ekspertizaning dastlabki ma’lumotiga ko‘ra marhuma o‘limiga chap o‘pkasini teshib o‘tib, yurak aorta tomirini jarohatlanishi oqibatida kelib chiqqan o‘tkir massiv ichki qon ketishi sabab bo‘lgani ko‘rsatilgan”, — deyiladi Bosh prokuratura axborotida.
Ta’kidlanishicha, hodisa joyini viloyat prokurorining birinchi o‘rinbosari B.Kamolov, viloyat prokuraturasi tarmoq boshliqlari — Sh.Mamarizayev va B.Qurbonov, viloyat IIB boshlig‘ining birinchi o‘rinbosari E.Safarov, G‘ijduvon tuman prokurori o‘rinbosari D.Safarov, tuman IIO FMB boshlig‘i A.Xoliqov hamda tezkor tergov guruhi a’zolari chiqib, voqeani o‘rgangan.
“Hodisa joyi va uning tevarak atrofi kriminalistik — texnika vositalari yordamida ko‘zdan kechirilib, bir dona oshxona pichog‘i, qonga o‘xshash dog‘lardan surtmalar hamda marhuma M.O.ning qonga o‘xshash dog‘lari bo‘lgan kiyimlari olingan. Holat yuzasidan 28-sentabr kuni tuman prokuraturasi tomonidan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, H.N. Jinoyat protsessual kodeksining 221-moddasi tartibida ushlanib, ehtiyot chorasi sifatida qamoqqa olingan”, — deyiladi rasmiy axborotda.
Qo‘shimcha qilinishicha, jinoyat ishi bo‘yicha G‘ijduvon tuman prokuraturasi tomonidan dastlabki tergov harakatlari olib borilmoqda.
Izoh (1)
Noqonuniy har qanday harakatdan qonun doirasida jazolanishi kerak maktab derektorini haydab jarima qullash kerak. Majburiy yiģimligini hamma bilib turibdi oldi qochdi gaplarga ishonadigan davrmas hozir