Litva Rossiya ishlari bo‘yicha vaqtinchalik ishonchli vakil Sergey Ryabokonni persona non grata deb e’lon qildi, u besh kun ichida mamlakatdan chiqib ketishi kerak. Bu haqda respublika Tashqi ishlar vazirligi saytida aytiladi.
Idoradan aniqlik kiritishlaricha, “vakolatli organlar axborot taqdim etgan, uning asosida “Sergey Ryabokonning yaqin oradagi xatti-harakatlari va bayonotlari diplomat maqomiga muvofiq kelmaydi va o‘zi bo‘lib turgan davlatning ichki ishlariga aralashuv deb baholanishi mumkin hamda shuning uchun diplomatik aloqalar to‘g‘risidagi Vena konvensiyasining buzilishi hisoblanadi” degan xulosaga kelingan.
Rossiyaning Litvadagi elchixonasi vakiliga, shuningdek, DXR, LXR, Zaporojye va Xerson viloyatlarining qo‘shib olinishi yuzasidan norozilik bildirildi.
Rossiya TIV vaqtinchalik vakolatli shaxsning mamlakatdan chiqarib yuborilishiga javob qilishga va’da berdi.
Vaqtinchalik vakolatli shaxs apreldan buyon Rossiya diplomatik missiyasiga rahbarlik qilib kelayotgandi. O‘shanda Litva Rossiya bilan diplomatik munosabatlar darajasini pasaytirib, uning elchisini chiqarib yuborgan va o‘z elchisini chaqirib olgandi.
Avvalroq Polsha, Germaniya, Buyuk Britaniya, Latviya, Shvetsiya, Daniya va Italiyada ham Rossiya elchilari TIVga chaqirilgandi
Izoh (0)