Rossiyada safarbarlikning birinchi kuni harbiy komissariatlarga qariyb 10 ming fuqaro o‘z ixtiyori bilan kelgan

Rossiyada qisman safarbarlik e’lon qilinganidan keyin bir kecha-kunduz ichida qariyb 10 ming kishi chaqiriq qog‘ozini kutmasdan o‘zlari harbiy komissariatlarga kelgan. Bu haqda Rossiya Qurolli kuchlari Bosh shtabi Bosh tashkiliy-safarbarlik boshqarmasi vakili kontr-admiral Vladimir Simlyanskiy ma’lum qildi, deb yozadi “RBK”.

“Qisman harbiy safarbarlik o‘tkazilgan birinchi kuni harbiy komissariatlarga 10 mingga yaqin fuqaro chaqiriq qog‘ozi kelishini kutmasdan, mustaqil ravishda keldi”, — dedi Simlyanskiy.

21-sentabr kuni Rossiya prezidenti Vladimir Putin Rossiyada qisman safarbarlik e’lon qilish haqidagi farmonni imzoladi. “Vatanimiz, yaxlitligimizni himoya qilish uchun qisman safarbarlikni qo‘llab-quvvatlash zarur, deb hisoblayman”, — dedi Rossiya rahbari.

Rossiya mudofaa vaziri Sergey Shoyguning aytishicha, qisman safarbarlik chog‘ida 300 ming zaxiradagi askar chaqiriladi. Uning so‘zlariga ko‘ra, bu Rossiya safarbarlik resursining taxminan 1 foizini tashkil qiladi.

Shundan keyin Rossiyada safarbarlik e’lon qilinishiga qarshi “Change.org” saytiga joylangan petitsiyani o‘n minglab odam imzoladi.

Safarbarlik e’lon qilinganidan keyin bir necha daqiqalar ichida Moskvadan Istanbulga, Tbilisiga va Yerevanga to‘g‘ridan to‘g‘ri reyslar uchun chiptalar to‘liq sotilib ketgan. Shuningdek, Moskvadan Toshkentga reyslar chiptalari ham qolmagan. Rossiyaning Qozog‘iston va Gruziya bilan chegaralarida bir necha kilometrlik navbatlar yuzaga keldi.

Armiyada xizmat o‘tagan, jangovar tajribaga yoki zarur harbiy mutaxassislikka ega bo‘lganlar chaqirilmoqda. Ularga shartnoma asosidagi harbiy xizmatchilar maqomi beriladi, so‘ng safarbar etilganlar tegishli to‘lovlarni ola boshladi, dedi mudofaa vaziri.

Idora keyinroq aniqlik kiritishicha, 35 yoshgacha bo‘lgan oddiy askar va serjantlar, 50 yoshgacha bo‘lgan kichik va 55 yoshgacha bo‘lgan katta ofitserlar safarbarlik bo‘yicha chaqiriladi. Birinchi navbatda o‘qchilar, tankchilar, artilleriyachilar, haydovchilar chaqiriladi. Harbiy hisobda turgan va “qisqa muddatli safar bilan” chet elda bo‘lganlar ham safarbar etilishi mumkin. Xorijda doimiy yashaydigan va harbiy hisobda turmaydiganlar safarbarlik ta’siriga tushmaydi.

Tegishli harbiy-hisob mutaxassisliklari bo‘lgan ayollar, xususan, tibbiy xodimlar ham xizmatga chaqirilishi mumkin. Salomatligi tufayli xizmatga vaqtinchalik yaroqsiz deb topilganlar hamda qaramog‘ida 16 yoshga to‘lmagan to‘rt va undan ortiq bolalari bo‘lganlar ham safarbar etilmaydi.