Surxondaryo viloyati Boysun tumanidagi fermer xo‘jaligida 17 tup archa va ko‘kterak kesib tashlandi. Bu haqda Davlat ekologiya qo‘mitasi xabar berdi.
Qayd etilishicha, viloyat Ekologiya va atrof-muhitni muhofaza qilish boshqarmasiga telefon qo‘ng‘irog‘i orqali Boysun tumanidagi “Dehibola” mahallasi hududida archa va ko‘kterak daraxtlarining kesilgani bo‘yicha murojaat qilingan. Ushbu murojaatga asosan viloyat Ekologiya hamda Milliy gvardiya boshqarmalari xodimlari hamkorligida tezkor ishchi guruh tuzilib, aytilgan manzilga yetib borilgan.
O‘rganish davomida shu manzilda faoliyat yuritib kelayotgan “N.H” fermer xo‘jaligi boshlig‘i N.A. xabardorligida va fermer xo‘jaligi ish yurituvchisi N.K. ishtirokida ko‘zdan kechirilganda fermer xo‘jaligiga biriktirilgan tog‘li hududda o‘suvchanligini yo‘qotmagan 10 tup Zarafshon archa, 7 tup ko‘kterak daraxti tag qismidan kesilgani aniqlandi.
Daraxtlarning kesilishi oqibatida “O‘simlik dunyosini muhofaza qilish va undan foydalanish to‘g‘risida”gi qonunning 37-moddasi talabi buzilgan. Ushbu harakat tufayli qonun buzilishiga yo‘l qo‘yilishi bilan bir vaqtda o‘simlik dunyosiga ham zarar yetkazilgan.
Ishchi guruh tomonidan o‘simlik dunyosiga yetkazilgan zarar o‘rganilganda 105 000 000 (bir yuz besh million) so‘mni tashkil etdi va ushbu zarar “N.X” fermer xo‘jaligiga hisoblandi.
Murojaat har taraflama o‘rganilgach, javobgarlik masalasini hal etish va yetkazilgan zararni undirish va aybdorlarga nisbatan qonunda belgilangan tartibda chora ko‘rish uchun to‘plangan hujjatlar sud organlariga o‘tkazilmoqda.
Izoh (0)