O‘zbekistonda mualliflik huquqini buzgan san’atkorlar reytingi tuzib chiqildi

Adliya vazirligi Mualliflik va turdosh huquqlar boshqarmasi tovon puli miqdoriga ko‘ra mualliflik huquqini buzgan san’atkorlar reytingini tuzib chiqdi.

5-o‘rin. Jaloliddin Ahmadaliyev.

U shoir Behzod Fazliddinga tegishli “Kutmagan kunlarim, kutgan kunlarim” to‘plamiga kirgan “Balosiz – go‘yoki g‘amimni yeysiz” deb boshlanuvchi she’ridan muallifning ruxsatisiz foydalangan. Fuqarolik ishlari bo‘yicha sudning qaroriga ko‘ra, xonanda J.Ahmadaliyevga jami 26 million so‘m tovon pulini shoirga to‘lab berish va “Ayyor do‘stlarim” nomli qo‘shiqni ijtimoiy tarmoqlardan olib tashlash majburiyati yuklatilgan.

4-o‘rin. Doston Ergashov.

U qo‘shiqchi O‘ktam Aliyevga tegishli “O‘ylamadim” qo‘shig‘idan huquq egasining ruxsatisiz foydalangan. Uzoq muddatli kelishmovchiliklardan so‘ng ushbu san’at vakillari o‘zaro kelishuvga erishgan. Kelishuvga muvofiq, “O‘ylamadim” qo‘shig‘ining muallifi O‘ktam Aliyev xonanda Doston Ergashovga nisbatan 500 million so‘m miqdoridagi moddiy va ma’naviy zararni undirish yuzasidan sudga kiritgan arizasini qaytarib olgan.

3-o‘rin. Sanjay (Sanjar Javberdiyev).

U shoir Usmon Azimga tegishli “Karvon” she’ridan noqonuniy foydalangani sababli shoir Usmon Azimga 90 million so‘mdan ortiq tovon puli undirilishi haqida sudning qarori chiqqan.

2-o‘rin. “Farhod va Shirin” juftligi.

Ular Shoir Bobur Bobomurodning she’riy asarlariga nisbatan mualliflik huquqlari buzilgani yuzasidan sud ishi ko‘rilgan va shoir hisobiga 130 million so‘m tovon puli undirish haqidagi sud qarori chiqqan.

1-o‘rin. Yulduz Usmonova.

U shoir Yo‘lchi Ro‘ziyev tegishli “Xasta bo‘lma” she’rini huquq egasining ruxsatisiz noqonuniy foydalanilgani sababli sudning qaroriga ko‘ra da’vogar Yo‘lchi Ro‘ziyev foydasiga umumiy miqdorda 185 million so‘m undirish belgilangan.

“Hurmatli ijod vakillari, sizning ham mualliflik va turdosh huquqlaringiz buzilayotgan bo‘lsa, hech tortinmasdan mualliflik huquqlaringizni himoya qilish uchun Adliya vazirligi Mualliflik va turdosh huquqlar boshqarmasiga murojaat qilishingiz so‘raladi”, — deyiladi xabarda.