“SHHT — G‘arbga qarshi tuzilgan tashkilot emas. Sammit kun tartibida global geosiyosiy inqiroz masalalari yo‘q” — Rahmatulla Nurimbetov

So‘nggi kunlarda Rossiya OAVlarida SHHT — Rossiya va Xitoyning NATOga javobi ekani haqidagi materiallar e’lon qilinmoqda.

O‘zbekistonning SHHT bo‘yicha milliy koordinatori Rahmatulla Nurimbetov esa sammit kun tartibida geosiyosiy inqirozlar masalasi yo‘q ekani, tashkilotga a’zo bo‘lmagan davlatlar haqida hech qanday chaqiruv yoki bayonotlar bo‘lmasligini ta’kidladi.

“Bu tashkilotda har bir masala, kun tartibi ham konsensus asosida shakllantiriladi.

Avvalo, milliy koordinatorlar kun tartibi yuzasidan har bir masalani kelishib olishadi. Shundan keyin kun tartibi tashqi ishlar vazirlari darajasida ko‘rib chiqiladi. Tashqi ishlar vazirlari Toshkentda 29-iyulda Samarqand sammiti kun tartibini tasdiqlashgan. Unda global geosiyosiy inqirozlar masalasi yo‘q.

Albatta, davlatlar yetakchilari global va mintaqaviy masalalar bo‘yicha fikr almashishi mumkin. Ammo bu masala bo‘yicha qaror loyihasi, hujjatlar, eng asosiysi, Samarqand deklaratsiyasida ham hech qanday geosiyosiy maqsadlarni ko‘zlaydigan bayonot, chaqiriqlar yo‘q va bo‘lmaydi ham.

Ha, bu bo‘yicha axborot foni bo‘lishi mumkin, bundan qochish imkonsiz, ammo yana bir marta ta’kidlayman, SHHT — G‘arbga yoki boshqa tashkilotlarga qarshi tuzilma emas”, — dedi Nurimbetov.