Albaniya Eron bilan diplomatik aloqalarni uzdi
Albaniya iyul oyida yuz bergan va Tehronni aybdor deb hisoblagan kiberhujumlardan so‘ng Eron bilan diplomatik aloqalarini uzdi, deb yozadi “Kommersant”.
AQSH NATO bo‘yicha ittifoqdosh sifatida Albaniyani qo‘llab-quvvatlashini bildirdi. Eron esa Albaniyaning kiberhujum bo‘yicha ayblovlarini “asossiz da’volar” deb atadi.
Albaniya Eron diplomatlari va elchixona xodimlariga 24 soat ichida mamlakatni tark etishni buyurdi. “Hukumat Eron Islom Respublikasi bilan diplomatik aloqalarni zudlik bilan tugatishga qaror qildi”, — dedi Albaniya bosh vaziri Edi Rama o‘z videomurojaatida. Eron Tashqi ishlar vazirligi Albaniyaning qarorini qoraladi.
AQSH bir necha hafta davom etgan surishtiruvlardan keyin 15-iyul kuni Albaniyaga uyushtirilgan “bemulohaza va mas’uliyatsiz” kiberhujum ortida Eron turibdi, degan xulosaga keldi. Albaniya hukumati ma’lumotlariga ko‘ra, kiberhujum “davlat xizmatlarini falajlab, mamlakatda xaosni yuzaga keltirish” xavfini yaratgan.
“AQSH o‘z ittifoqdoshining xavfsizligiga xatar soluvchi va kibermakonda xavotirli pretsedent yaratuvchi harakatlari tufayli Eronni javobgarlikka tortish uchun bundan keyingi choralarni ko‘radi”, — deyiladi Oq uy Milliy xavfsizlik kengashi bayonotida.
