Shanxay hamkorlik tashkilotiga a’zo davlatlar ichki ishlar va jamoat xavfsizligi vazirlari kengashi doirasida 18-avgust kuni O‘zbekiston ichki ishlar vaziri, general-leytenant Po‘lat Bobojonovning Qirg‘iziston ichki ishlar vaziri, militsiya general-leytenanti Ulan Niyazbekov bilan uchrashuvi bo‘lib o‘tdi.
Ta’kidlanishicha, uchrashuvda zamonaviy dunyoning jinoyat turlari, xususan, axborot sohasidagi jinoyatchilik, terrorizm va ekstremizm, noqonuniy migratsiya, narkotik va qurol-yarog‘ savdosi, odam savdosi kabi jinoyatlarni hisobga olgan holda hamkorlikni yanada kengaytirish zarurligi qayd etildi.
Bundan tashqari, jinoyatchilikka qarshi kurashish, kadrlarni tayyorlash va qayta tayyorlash, shuningdek, mintaqaviy xavfsizlik va barqarorlikni mustahkamlash borasida ikki tomonlama idoralararo hamkorlikni rivojlantirish istiqbollari masalalari muhokama qilindi.
O‘zbekiston ichki ishlar vaziri Po‘lat Bobojonov va uning qirg‘izistonlik hamkasbi Ulan Niyazbekov o‘zaro hamkorlikning uzoq muddatli istiqbolini ko‘zda tutuvchi ikki davlat o‘rtasidagi hamkorlik to‘g‘risidagi anglashuv memorandumini imzoladi.
Izoh (0)