Xorazm viloyatining Xonqa tumanidagi bog‘chada 5 yoshli bola vafot etgani haqida xabar berilgan edi. Viloyat prokuraturasi holat yuzasidan rasmiy ma’lumot berdi.
Aniqlanishicha, Xonqa tumani, “Toma” mahallasida joylashgan 24-son davlat maktabgacha ta’lim tashkiloti 2-katta guruh tarbiyalanuvchisi 5 yoshli Sh.O‘. 3-avgust kuni bog‘chada tushlikdan keyin o‘zini yomon his qila boshlaganini payqagan tarbiyachi A.R. bog‘cha hamshirasi A.J.ni chaqirgan.
Hamshira tomonidan bolaga birinchi yordam ko‘rsatilgan va bu haqda tez tibbiy yordam hamda bolaning ota-onasiga xabar berilgan. Bola tez tibbiy yordam mashinasida Xonqa TTB olib borilgan hamda ko‘rsatilgan tibbiy muolajalarga qaramasdan tibbiyot birlashmasi jonlantirish bo‘limida vafot etgan.
Marhum bolaning ota-onasining so‘zlariga ko‘ra, Sh.O‘.ning tutqanog‘i tutib turgan. Biroq bu haqda maktabgacha ta’lim muasasasi xodimlarini ogohlantirishmagan, shuningdek, bola epilepsiya yoki boshqa kasallik bilan tibbiyot birlashmasi hisobida turmagan.
Xabarda aytilishicha, mazkur holat yuzasidan Xonqa tuman prokuraturasi tomonidan tergovga qadar tekshiruv olib borilmoqda, tekshiruv viloyat prokuraturasi tomonidan nazoratga olingan.
Eslatib o‘tamiz, 28-iyul kuni Qashqadaryo viloyati Shahrisabz shahridagi bog‘chada tarbiyalanuvchining opasi ustiga shisha siniqlari tushishi oqibatida vafot etgandi. 1-avgust kuni Namangan viloyati Chust tumanidagi bog‘chada tilini chaynab yuborgan 5 yoshli bola vafot etgandi.
Izoh (0)