O‘zbekistonda xizmat ko‘rsatgan artist, Kino arboblari uyushmasi raisi, aktyor Matyoqub Matchonov “Chotki TV” YouTube kanaliga bergan intervyusida farzandlari, biznesga qanday qiziqib qolgani, “Ippodrom”da, Dubayda narsa sotgani, nima sababdan ekranlarda ko‘rinmay qolgani, qancha oylik olishi va 120 ming dollarga teng mashinasini kim olib bergani haqida gapirdi.
Matyoqub Matchonov farzandlari haqida
“Uchta farzandim bor: ikkitasi o‘g‘il va bittasi qiz. Qizim 12 yildan beri o‘zim bilan turadi, uni ham uch nafar farzandi bor. Hech kimga tosh otgim kelmaydi. Nevaralarimning kattasi olti yosh, o‘rtanchasi 4 yosh va kichigi 3 yosh bo‘lganda uydan haydab yuborishgan. Chunki men bir umr qulluq qilib o‘tishim kerak edi, qiz berganim uchun aybdorman. Bilmadim, ularga tosh otmayman. Qizim ham, uchta farzandi ham o‘zimning qaramog‘imda”, — deydi aktyor.
Biznesga qanday qilib qiziqib qolgani, “Ippodrom”da va Dubayda narsa sotgani haqida
“Biznesni boshlashim juda g‘alati bo‘lgan. Hindistonga 90-yilning boshida birinchi marta o‘zbek guruhi bilan kino olgani ketganmiz. “Alif Laylo yoki makkora” filmini suratga olish uchun bir qancha mashhur aktyorlar: Obid Asomov, Mirzabek Xolmedov, men, Husan Sharipov, Tamara Shokirova, Oybarchin Bakirova bilan borganmiz. Obid Asomov o‘sha paytda “Ovchi” filmi sabab Hindistonga borib kelgandi, ya’ni u yerning ob-havosini bilarkan.
Ketayotgan vaqtimiz xursand bo‘ldik, ungacha Germaniyaga borgan edik. Shunda u buni olish kerak, uni oling tirikchilik bo‘ladi deb aytdi. Keyin uyimdagi kichkina bo‘lib qolgan kostyumim bormi, berkitmayman, soldatlar kiyadigan paypoqdan olibman nima qilishni bilmay. Nima narsa olib ketishni bilmagandim. Bozorda turib hamma narsani sotdik. Obid Asomov nima sotilishini bilgan ekan, fotoapparatlar olgan edi. Fotoapparatlar yaxshi sotilar ekan, bizga aytmagan, bilmaganmiz. U shuni sotadi, rasmga oladi, bu yerda biz qiyiqcha, paypoqlarni ushlab turibman.
Qarasam paypoq kiyadigan odam yo‘q, hamma yalangoyoq. Paypoqni nima uchun olib kelding deydigan odam yo‘q. Boshim qotdi, bir to‘da olib borgandim. U yoqda bittasi qiyiqcha deydi, hech kim olmaydi. Bir payt bittasi kelib qoldi, ko‘ylak kiygan, bo‘yinbog‘ taqqan. Menga ‘jo‘robiy’, dedi. Avval tushunmadim, keyin bilsam paypoq degani ekan. Hind xalqini bir qiziq odati bor, ikki kishi to‘plansa darrov gavjum bo‘lib ketadi. Keyin Mirza ham artistlik qilib qiyiqchalarni unaqa qilasan, boshingga o‘raysan, belga bog‘lasang ham bo‘ladi, joynamoz qilsang ham bo‘ladi deb, baqir-chaqir qilib sotdi.
Qo‘limga uch-to‘rt so‘m pul tushdi. Keyin bu pulga narsa olish kerak edi. Bozorga kirganimdan keyin bu narsa bizda buncha, unisi uncha deb solishtira boshladim. U payti endi charm kurtkalar paydo bo‘lgan vaqt edi, qarasam charm plash, kurtka biznikidan ikki barobar arzon. Bolalarimga bir-ikkita narsa oldim, o‘zimga hech narsa olmay sotishga ikkita plash oldim. Sotganimdan keyin pul yoqib qoldi. Qarasam kinodan topgan daromadimdan ancha yuqori daromad topib qiziqib qoldim. Keyin bu orada qarz bilan bo‘lsa ham Dubayga borib fotoapparat, soat sotib sekin-sekin ishdan chalg‘imagan holatda biznesga kirishib ketdim.
O‘sha paytda odamlarda pul yo‘q edi, spektaklga kirmas edi. O‘z hisobimdan ikki-uch oyda Dubayga borib kelib biznesni yo‘lga qo‘ydim. Ko‘p qiyinchiliklar bo‘lgan, ‘Ippodrom’da ham narsa sotganman. Ko‘p narsalarni eshitardim, odamlar oldimga kelib ko‘zoynakni olib turing, siz ‘Bozor ko‘rmagan yigit’dagi aktyormisiz degan. Unaqalarni ham, ustimizdan kulganlarni ham ko‘rganmiz. Hayot shunaqa ekan”, — deydi Matyoqub Matchonov.
Matyoqub Matchonov nima sababdan ekranlarda ko‘rinmay qoldi?
“Takliflar ko‘p, lekin ular meni qoniqtirmayapti. Gap pulda emas, men pul uchun rol o‘ynaydigan aktyor emasman, hamma narsam yetarli. Talabimga javob bermaydi. Agar o‘sha rollarni o‘ynasam xalqni oldiga chiqib nima deyman? Meni shu darajaga xalqim olib keldi, e’tirof etdi, hurmat qildi, to‘yga chaqirdi, xalqni orqasidan mablag‘ topdim, boylik yig‘dim, imorat qildim, xullas ko‘p narsa bo‘ldi. Rollarim, sababli, shundan keyin o‘zimga yoqmagan rollarni o‘ynay olmayman”, — deydi aktyor.
Matyoqub Matchonov qancha oylik olishi va 120 ming dollarlik mashinani kim olib bergani haqida
“Men ko‘p joydan oylik olaman. Kino arboblari uyushmasi raisi lavozimidan 3 million so‘m oylik olaman. Narxi 120 ming dollarlik BMW mashinani o‘g‘lim 60 yoshga kirganimda sovg‘a qilgan”, — deydi Matyoqub Matchonov.
Mavzuga doir:
Izoh (0)