AQSH Senati Finlyandiya va Shvetsiyaning NATOga qo‘shilishi haqidagi protokollarni ratifikatsiya qilish to‘g‘risidagi rezolyutsiyani ma’qulladi, deb yozadi “RBK”.
Reuters ma’lumotlariga ko‘ra, mamlakatlarning alyansga qo‘shilishini yoqlab 83 senator ovoz bergan, bir kishi qarshi chiqqan.
Shu tariqa, rezolyutsiya zarur bo‘lgan 67 tadan ortiq ovoz bilan qabul qilindi, AQSH esa qonun chiqaurvchi organlari NATOning kengayishi haqidagi hujjatni ratifikatsiya qilgan 20 dan ortiq mamlakatlar ro‘yxatini to‘ldirdi. Shvetsiya va Finlyandiya NATO blokiga qo‘shilishi uchun alyansga a’zo bo‘lgan 30 ta mamlakatning barchasi tegishli bitimni ratifikatsiya qilishi kerak.
AQSH prezidenti Jo Bayden Senatning qarorini ma’qulladi va senatorlarga jarayonni tezlashtirgani uchun minnatdorlik bildirdi. Baydenning fikricha, Finlyandiya va Shvetsiyaning alyansga qo‘shilishi uning jamoaviy xavfsizligini yanada mustahkamlaydi. U AQSH ushbu mamlakatlar xavfsizligiga hamon sodiqligini ta’kidladi.
18-may kuni Finlyandiya va Shvetsiya Ukrainadagi jangovar harakatlar avj olgan bir paytda NATOga qo‘shilish uchun ariza bergan. Turkiya Xelsinki va Stokgolmni mamlakatda taqiqlangan Kurdiston Ishchilar partiyasi bilan hamkorlikda ayblab, ularning alyansga qo‘shilishga bir muddat to‘sqinlik qildi.
12-iyul kuni AQSH prezidenti Jo Bayden AQSH Kongressi Senatiga mamlakatlarning NATOga kirishi haqidagi protokollarni ratifikatsiya qilish uchun kiritdi. 19-iyul kuni rezolyutsiya Vakillar palatasi tomonidan ma’qullandi. Rossiya prezidenti Vladimir Putin Finlyandiya va Shvetsiya o‘z hududiga alyansning harbiy infratuzilmasini joylashtirsa, Moskva tegishli javob berishga majbur bo‘lishini aytdi.
Avvalroq Finlyandiya va Shvetsiyaning NATOga qo‘shilishi haqidagi protokollar Polsha, Estoniya, Islandiya, Kanada tomonidan ratifikatsiya qilingan edi.
Izoh (0)