O‘zbekistonda yil boshidan beri birinchi marta deflyatsiya qayd etildi. Bu nimani anglatadi?

O‘zbekistonda iyul oyida 0,1 foizlik deflyatsiya qayd etildi. Bu haqda Davlat statistika qo‘mitasi hisobotida ma’lum qilingan.

Deflyatsiya — narxlarning pasayishi va milliy valyutaning xarid qobiliyatini oshirish jarayoni.

Inflyatsiya tovarlar va xizmatlar narxi ko‘tarilganda, deflyatsiya esa bu narxlar pasayganda sodir bo‘ladi. Ikki iqtisodiy shart o‘rtasidagi muvozanat juda nozik va iqtisodiyot tezda bir holatdan ikkinchisiga o‘tishi mumkin.

Yil boshidan buyon inflyatsiya 6,4​​ foizni, yillik nisbatda esa 12,3 foizni tashkil etdi. Iyun oyida inflyatsiya 0,9 foiz edi.

O‘zbekistonda iyun-iyul oylarida deflyatsiya odatda doimiy sodir bo‘ladi. Sabab — oziq-ovqat mahsulotlari narxlarining pasayishi. Iyulda ular oy davomida 1 foizga arzonlashdi.

Bundan tashqari o‘tgan oyda nooziq-ovqat mahsulotlari o‘rtacha 0,9 foizga, xizmatlar esa 0,3 foizga qimmatlashdi.

Markaziy bank 2022-yilda inflyatsiya 12-14 foizga yetishini prognoz qilgan. Taqqoslash uchun, 2021-yilda u 9,9 foizni tashkil qilgan edi.

Avvalroq Markaziy bank O‘zbekistondagi narxlar bilan bog‘liq vaziyatni tushuntirgan edi.