Ayollar futboli bo‘yicha Yevro—2022 finali tomoshabinlar tashrifi bo‘yicha 58 yillik rekordni yangiladi

Ayollar futboli bo‘yicha Yevro—2022 finali muxlislar tashrifi bo‘yicha rekord qayd etdi.

Angliya va Germaniya terma jamoalari o‘rtasidagi final bahsida inglizlar 2:1 hisobida g‘alaba qozonib, o‘z tarixida ilk bor chempionga aylandi.

“Uembli”da bo‘lib o‘tgan uchrashuvga 87 192 tomoshabin tashrif buyurgan.

Bu ayollar futboli bo‘yicha ham, erkaklar futboli bo‘yicha ham Yevropa chempionati rekordi hisoblanadi.

Yevropa chempionati finallari bo‘yicha avvalgi rekord har ikkala jins vakillari uchun 1964-yilda o‘rnatilgan. O‘sha vaqtdagi erkaklar o‘rtasidagi “Santiago Bernabeu”da bo‘lib o‘tgan Ispaniya va SSSR terma jamoalari bahsiga 79 115 muxlis tashrif buyurgan.