Dehqonlar xavotiri: Rossiyaning importi tufayli Qozog‘istonda g‘alla narxi arzonlashmoqda

Qozog‘iston bu yil 13,5 mln tonnagacha bug‘doy yetishtirishi rejalashtirilmoqda. Bu haqda Eurasianet xabar berdi.

Dehqonlar nisbatan arzonroq rus qishloq xo‘jaligi mahsulotlari importi ularning daromadlarini qisqartirishi mumkinligidan xavotirda.

Mamlakatning bu yilgi bug‘doy yetishtirish prognozi 13—13,5 mln tonnani tashkil etadi, ya’ni o‘tgan yilga nisbatan 15-20 foizga ko‘p hosil olinadi.

Yiliga yetishtirilayotgan 12 mln tonna bug‘doyning qariyb yarmi ichki iste’mol uchun mo‘ljallangan, qolgan qismi esa xomashyo yoki un sifatida eksport qilinadi.

Joriy yilda qariyb 7 mln tonna bug‘doy eksport qilinishi rejalashtirilgan.

O‘zbekiston Qozog‘iston bug‘doyining asosiy xaridori hisoblanadi. Joriy yilning birinchi choragidagi ma’lumotlarga ko‘ra, mamlakat Qozog‘istonning qariyb 40 foiz bug‘doyini import qilgan.

Energyprom iqtisodiy monitoring agentligi ma’lumotlariga ko‘ra, Eron va Afg‘oniston ikkinchi va uchinchi yirik xaridorlardir.

Ayni paytda Qozog‘iston bug‘doy eksportiga cheklovlar qo‘ymoqda. 5-iyuldan sentabr oyi oxirigacha xorijga atigi 550 ming tonna mahsulot sotilishi mumkin.

Fermerlar uchun xavf Rossiyadan arzonroq bug‘doyning kirib kelishi bilan bog‘liq.

Rossiya bu yil rekord darajada — 90 mln tonna bug‘doy yig‘ib oladi. Bu mahsulotning bir qismi Qozog‘istonga qonuniy yo‘l bilan ham, boshqa sxemalar orqali ham jo‘natiladi, — dedi Petropavlovskdagi “Northern Grain” savdo kompaniyasi asoschisi Yevgeniy Karabanov.

Karabanov ta’kidlaganidek, iyul oyi boshidan beri Qozog‘istonda ichki don narxi Rossiya importi tufayli 17 foizga arzonlashgan. Bu tendensiya davom etadi.

Avvalroq Ukraina va Rossiya millionlab tonna g‘alla eksporti bo‘yicha kelishuvga erishgani haqida xabar berilgandi.