Namangan viloyati Chust tumanida yashovchi fuqaroning bank karta mablag‘larini o‘zlashtirgan chet el fuqarosi ushlandi. Bu haqda viloyat Ichki ishlar boshqarmasi xabar qildi.
Qayd etilishicha, Chust tumanida yashovchi A.S. (20 yoshli) ariza bilan murojaat qilib, bank kartasidagi 10 million so‘mga yaqin mablag‘lar o‘g‘irlanganini ma’lum qilgan. O‘rganishlar davomida noma’lum firibgar tomonidan A.S.ning bank kartasidagi pullar Andijon viloyatida yashovchi kripto-aktivlarni olish-sotish bilan shug‘ullanuvchi J.A. (21 yoshli)ning bank kartasiga o‘tkazilgani aniqlangan. J.A. esa ushbu mablag‘ni dastlab kriptovalyutaga aylantirib, o‘zining hisobidan ushbu ekvivalentdagi 800 dollarga yaqin mablag‘larni noma’lum firibgarning hisob raqamiga o‘tkazib bergan.
Olib borilgan tezkor-qidiruv tadbirlari natijasida ushbu noqonuniy harakatni Qirg‘iziston Respublikasi fuqarosi O.S. (24 yoshli) Bishkek shahrida turib amalga oshirgani ma’lum bo‘lgan.
Ushbu holat bo‘yicha to‘plangan hujjatlar yuzasidan tergovga qadar tekshiruv harakatlari davom ettirilmoqda.
Mavzuga doir:
- Andijonda 8-sinf o‘quvchisi o‘nlab fuqarolarning pullarini qo‘lga kiritib, PUBG o‘yiniga tikib yuborgani aniqlandi
- Toshkentda yashovchi o‘smir 17 nafar buxorolikning plastik kartochkasidagi pullarni o‘g‘irlagani ma’lum bo‘ldi
- Toshkentda O‘zbekiston prezidenti va SSV nomidan feyk xabarlarni tarqatgan 22 yoshli yigit qo‘lga olindi