“Uch mushketyor” filmdagi Vinter va “Oxurdagi it” filmidagi Diana — bu ikkita obraz Margarita Terexovaning buyuk badiiy iste’dod egasi ekanini namoyon etdi va ushbu ijrolar aktrisaning muxlislari qalbidan chuqur joy oldi. Biroq go‘zal, jasur va o‘ziga ishongan sahna obrazlarini gavdalantirgan aktrisaning shaxsiy hayotda uncha omadi kelmaganini juda kam odam biladi.
Qisqa muddatli nikohlar va turli otalardan bo‘lgan farzandlar… Margarita Terexova oilaviy baxtni shunday tasavvur qilganmidi? Ko‘p yillardan keyin aktrisa nihoyat o‘zi istagan umr yo‘ldoshni uchratadi, biroq bu nikoh ham uzoqqa bormaydi.
A’lochi talaba, sportchi va orzudagi go‘zallik sohibasi
Margarita Terexova 1942-yilning 23-avgust sanasida Sverdlovsk viloyatining Turinsk shahrida tug‘ilgan. Aktrisa tug‘ilganidan ko‘p vaqt o‘tmay uning oilasi O'zbekistonning poytaxti Toshkentga ko‘chib o‘tgan. Bu qaror Margaritaning jismoniy holati bilan bog‘liq edi, uning sog‘lig‘i uchun janubiy iqlim Uralga nisbatan ancha foydali edi.
Margarita tez-tez kasal bo‘lishiga qaramay, qat’iyatliligi sabab boshqalardan ortda qolmadi. U bilan bir hovlida yashagan, keyinchalik mashhur “D’Artanyan va uch mushketyor” badiiy filmining rejissori bo‘lgan Georgiy Yungvald-Xilkevich bo‘lajak aktrisani jonli, faol qiz sifatida eslaydi.
Bo‘lajak aktrisa maktab yillarida sportga mehr qo‘ydi, bir paytlar u basketbol bo‘yicha O‘zbekiston yoshlar terma jamoasining sardori bo‘lgan. Margaritaning go‘zalligi bilan ham tanilgan. U maktabda o‘qib yurgan yillari ozg‘in, uzun oyoqli qiz bo‘lgan va Margaritaning bir lahzaga nigohi tushishini orzu qilgan muxlislari paydo bo‘lgan.
Nufuzli universitet o‘rniga aktyorlik maktabi
Maktab yillarida Margarita Terexova nafaqat sportda, balki ta’lim sohasida muvaffaqiyatga erishdi. Qiz maktabning eng yaxshi o‘quvchilaridan biri bo‘lganligi sababli ma ktabni oltin medal bilan tugatdi va Toshkent davlat universitetining o‘sha paytdagi fizika-matematika yo‘nalishiga o‘qishga kirdi. Bir-ikki yil o‘qigandan keyin aniq fanlarga umuman qiziqmasligini anglab yetdi. Bu voqeadan keyin Margarita o‘qishni tashlab, aktyorlik sohasida o‘z omadini sinab ko‘rish uchun Moskvaga yo‘l oladi.
Afsuski, Margarita o‘qishga kirmoqchi bo‘lgan teatr institutida abituriyentlarni qabul qilish jarayoni allaqachon tugagan bo‘ladi va shu sababli u o‘qishga hujjat topshirishga ulgurmaydi. Bundan tashqari komissiya a’zolari aktrisani Rossiya davlat kinemotografiya institutiga ham qabul qilishmaydi, chunki ularga aktrisaning haddan tashqari oddiy ko‘rinishi yoqmaydi.
Ketma-ket kelgan muvaffaqiyatsizliklar Margaritani to‘xtatib qolmaydi: amalga oshmagan umidlar uchun ko‘z yoshlarini to‘kish o‘rniga, u Mossovet teatridagi studiya maktabiga hujjat topshirishga qaror qiladi. Nihoyat aktrisaga omad kulib boqadi va u hech qanday muammosiz qabul qilinadi. Bundan tashqari bo‘lajak aktrisa bir necha oy ichida aktrisalik mahoratini yuqori darajada namoyish etadi va o‘qituvchilarni ham rom etib guruh rahbariga aylanadi.
Bu esa uning jamoasidagi boshqa ayollarga uncha yoqmaydi. Aktrisa bu voqealarga e’tibor qaratmaydi. Margarita aktryorlik san’atiga shunchalik berilib ketadiki, hattoki uzun sochlarini kesib tashlaydi, chunki u sochlari parvarishiga ko‘p vaqt sarflashni istamagan.
Birinchi muvaffaqiyat va tarsaki
Studiya maktabini tugatgach, Margarita Terexova ushbu o‘quv muassasasi joylashgan Moskva shahar kengashi teatrida ishlay boshlaydi. Umrini teatrga bag‘ishlagan 20 yilida aktrisa turli spektakllarda asosiy va ikkinchi darajali rollarni ijro etadi. Tomoshabinlar Margarita Terexova ishtirokidagi “Masxarabozning ko‘zi bilan”, “Sezar va Kleopatra” kabi spektakllarni alohida e’tirof etdi.
1983-yilda aktrisa Igor Talkov bilan birgalikda “Balaganchik” nomli teatr guruhini tashkil qiladi. Uch yildan so‘ng teatr guruhi tarqaladi va Margarita o‘zi ishlagan teatrga sahna rejissori sifatida qaytib boradi.
Aktrisaning filmografiyasida teatrdagi ijrolaridan tashqari ko‘plab badiiy filmlar mavjud. Margarita Terexova birinchi marta “Salom, bu men” badiiy filmida rol o‘ynadi. Ammo birinchi muvaffaqiyat aktrisaga Nina Urgant, Evgeniy Leonov va Anatoliy Papanov kabi mashhur aktyorlar rol o‘ynash baxtiga muyassar bo‘lgan “Belarus stansiyasi” filmi chiqqandan keyin keldi. Keyinchalik Margarita Terexova “Oxurdagi it” filmidagi Diana rolini ijro etdi.
Bu voqealardan so‘ng aktrisa intiluvchan aktyor Mixail Boyarskiy bilan birga ishlaydi. Aktyor sahnada uncha yaxshi rol o‘ynamaganligi sababli roldan chetlashtiriladi, Margarita esa sherigini himoya qiladi. Aktrisa rolga shunchalik berilib ketadiki, suratga olish maydonchasida Boyarskiyga rosmana tarsaki tushiradi. Natijada aktyorning burni qonaydi.
Ushbu filmdagi roli Boyarskiyning o‘ziga ham foyda keltiradi: Georgiy Yungvald-Xilkevichga uning ijrosi shu qadar yoqadiki, u yigitga “D’Artanyan va uch mushketyor” filmidagi jasur Gaskon rolini taklif qiladi.
Margarita Terexovaning birinchi eri Vyacheslav Butenko edi. Bo‘lajak geodezik yosh qizning go‘zalligi va o‘zgacha hissiyotlaridan shunchalik “ko‘r” bo‘lib qoladiki, u ikkilanmasdan universitetdagi o‘qishni tashlab, Margarita tahsil olayotgan teatr maktab-studiyasiga o‘qishga kiradi. Yigit Margaritaning qalbini zabt etishiga bir yil kerak bo‘ldi. Bu nikoh uch yil davom etdi.
Margarita ikkinchi sevgisini “To‘lqinlarda yugurish” filmining suratga olish maydonchasida uchratdi. Bu uning suratga olish maydonchasidagi partnyori bolgariyalik Savva Xashimov edi. O‘sha paytda qonuniy nikohda bo‘lgan Savva Terexova sabab oilasini tashlab, sevgilisi bilan Moskvadagi yotoqxonalardan biriga joylashadi.
Bir necha yil o‘tgach, juftlikning birinchi farzandi — Anna dunyoga keladi. Oradan 2 yil o‘tgach, ular yashash joyini kelisha olmaganligi uchun ajrashadi, chunki Margarita Moskvani tark etishni istamaydi. Savva ham o‘z ona yurti Bolgariyaga qaytishni istaydi.
Terexovaning keyingi sevgilisi Tojikistondagi yirik korxonalardan birining rahbari Sayfiddin To‘rayev bo‘ldi. Aktrisaning bu turmushidan bir nafar o‘g‘il dunyoga keladi. Biroq, bolaning otasi oilali erkak ekanligi hamda uning ajrashish niyati yo‘qligini inobatga olib, Margarita uzoq yillar mobaynida o‘g‘liga otasi haqida gapirmaydi.
Aktrisaning farzandlari uchun eng yaxshi ota rejissor Georgiy Gavrilov bo‘ldi. Ularning munosabati 15 yillik baxtli turmushdan so‘ng o‘z nihoyasiga yetdi. Keyinchalik Margarita boshqa turmush qurish niyati yo‘qligini aytdi va Moskvadagi uyida yolg‘iz hayot kechirdi.
Izoh (0)