“Lisa.ru” nashri Nikol Kidmanning 55 yoshga to‘lishi munosabati bilan uning bolalikdagi sevimli mashg‘ulotlari, shuningdek, muhabbati va boshdan kechirgan qiyinchiliklari haqida so‘z yuritdi.
Ona Vatan
Nikolning ota-onasi asli avstraliyalik, lekin aktrisaning otasi olim bo‘lgani uchun oila Amerikaga ko‘chib kelgan. Nikol tug‘ilgach, uning oilasi Gavaiga ketishga majbur bo‘ldi. U to‘rt yoshga to‘lganda, ota-onasi o‘z vataniga qaytib ketdi. So‘ngra Avstraliyada aktrisaning singlisi Antoniya dunyoga keldi.
Qo‘rquv
Aytgancha, aktrisa Avstraliyada yashashni yoqtirmasdi, chunki u yerda kapalaklar ko‘p bo‘lgani uchun qo‘rqardi. Bolaligida Nikol doimo hasharotlar ko‘p joylardan qochgan. Kidman katta bo‘lganida bu muammoni hal qilishni xohladi va ataylab kapalaklar ko‘p bo‘lgan xonaga kirdi. Biroq uning fobiyasi saqlanib qoldi.
Quyoshdan qo‘rqish
Nikol nafaqat kapalaklardan, balki quyoshdan ham qo‘rqadi, chunki Avstraliyada havo juda issiq. Gap shundaki, aktrisaning oppoq terisi quyosh nuri ta’sirida tez kuyib ketishi mumkin. Shuning uchun u hali ham maxsus aksessuarlardan foydalanmasdan uydan chiqmaydi.
Uyatchan qiz
Kidman bolaligida juda kamtar va hatto uyatchan bola bo‘lganini eslaydi. Ko‘pchilik buni bilib, hayratda qoldi, chunki hamma aktrisani kirishuvchan odam sifatida biladi.
Kichik nuqson
Bolaligida Nikol duduqlanardi, shuning uchun gapirishga uyalardi. Ota-ona qizini komplekslarni yengib, muammodan xalos bo‘lishi uchun teatr studiyasiga yuborishga qaror qilgan. Vaqt o‘tishi bilan Kidman duduqlanishdan to‘xtadi, shuningdek, studiyani chindan ham sevib qoldi.
Muvaffaqiyatsizliklar
Kidman juda yoshligidan kastinglarga borishni boshladi, u musiqiy filmlarda rol ijro etishni xohlardi. Bir marta kastingdan o‘tdi, u yerda kambag‘al yetim rolini o‘ynashi kerak edi. Biroq u rolga tasdiqlanmagan, chunki uni bunday qahramon rolini o‘ynash uchun juda novcha deb hisoblashgan. Keyin Nikol unga hech bo‘lmaganda kichik rol berishni iltimos qilgan va oxirida unga qo‘shiqning atigi to‘rt misrasini kuylashga ruxsat berishgan.
“Ha, men umidsizlikka tushib qoldim, lekin shu bilan birga bu meni dahshatli kuch bilan qo‘zg‘atdi! Xuddi shu rad etish bilan mening ichki olovimga o‘tin tashlangandek. Men 17 yoshga to‘lgunga qadar qancha sinovlardan o‘tganman, sanab bo‘lmaydi. 12 yoshimdan o‘qigan aktyorlik studiyasiga borish uchun esa ikkita avtobusga chiqishim kerak edi. Ota-onam meni mashinada olib ketishni istamasdi. Shu tufayli maqsadimga erishish uchun ko‘p kuch va matonat ko‘rsatishim kerak bo‘ldi. Ammo o‘zimni teatrda, shu darslarda ko‘rganimda, dunyodagi eng baxtli boladek his qildim!” — dedi yulduz intervyularining birida.
Onaga yordam
O‘rta maktabni tugatgandan so‘ng Nikol kollejga bordi va u yerda san’at va aktyorlik bo‘yicha tahsil oldi. Biroq, u onasining saraton kasalligiga chalinganini bilgach, o‘qishni tark etishga majbur bo‘ldi. Oilaga moddiy yordam berish uchun Kidman massaj kurslarida ishtirok etdi va qo‘shimcha pul ishlab topishni boshladi.
Musiqaga qiziqish
Nikol 17 yoshida nafaqat teatr studiyasida o‘qigan, balki “Divine Madness” musiqiy guruhining solisti ham bo‘lgan.
Orzular ro‘yobi
Biroq Nikol o‘z istagini amalga oshirdi — u aktrisa bo‘ldi. U 80-yillarning oxirida filmlarda rol o‘ynay boshladi va tezda tanildi. Amerikaning nufuzli nashrlari u haqida yozdi, u muhim mukofotlarga nomzod bo‘ldi va yanada muvaffaqiyatli, yaxshi loyihalarda rol o‘ynashga taklif qilindi.
Kino uchun qurbonliklar
Aktrisa “Oskar” olgan “Mulen Ruj!” filmining suratga olish jarayonida qovurg‘asini sindirib oldi. Jarohat Nikolning sherigi Yuan Makgregor uni tasodifan tushirib yuborgani sababli yuzaga kelgan. Shunga qaramay, yulduz suratga tushishda davom etdi.
Keyinroq u korseti qattiq tortilganda yana bir qovurg‘asini jarohatlagan, Kidmanning o‘zi esa baland poshnali tuflisida turolmagani uchun yiqilganida oyog‘ini jarohatlagan.
Birinchi nikoh
“Momaqaldiroq kunlari” kartinasining suratga olish maydonchasida Nikol Tom Kruz bilan uchrashdi. Juftlik o‘n yil birga yashab, o‘g‘il va qiz farzand asrab olishga muvaffaq bo‘ldi, ammo oxir-oqibat ular ajrashishdi. Ularning ajrimiga Tomning sayentologiyadagi sevimli mashg‘ulotlari va bolalarni tarbiyalashga bo‘lgan turli qarashlari tufayli bahslashgani sabab bo‘lgani haqda mis-mishlar tarqaldi.
“Men bu ta’limotni chin dildan tushunishga harakat qilgan paytim bo‘ldi. Aslida, men hech narsani mutlaq darajaga ko‘tarmayman. U har doim izlanuvchan, yangi bilimlarga chanqoq, temperamentli va jasur edi. Men uchun hech kim hukm chiqarmaslik juda muhim. Dadam har doim: “Bag‘rikenglik eng muhimi”, — deydi aktrisa.
Kruzning sobiq xotinining bashorati
Tom Nikol bilan uchrashishni boshlaganida, uning sobiq rafiqasi, aktrisa Mimi Rojers endi Kidman o‘z karyerasini qura olmasligini, chunki u doimo taniqli juftining soyasida bo‘lishini aytgan. Biroq uning bashorati amalga oshmadi, chunki aktrisaning o‘zi muvaffaqiyatga erisha oldi va Tomdan kam bo‘lmagan taniqli va sevimli Gollivud yulduziga aylandi.
Yangi baxtli nikoh
2005-yilda Nikol avstraliyalik musiqachi Kit Urban bilan uchrashdi va bir yildan keyin ular turmush qurdi. Ular hozirda ham baxtli.
“Turmush o‘rtog‘im Kit yonimda bo‘lsa, men o‘zimni juda yaxshi his qilaman. U bilan men dunyodagi hamma narsa haqida gaplasha olaman, u meni sevadi va men uni sevaman. U bilan uchrashishdan oldin men qo‘rqdim, ko‘p narsadan qo‘rqdim, hayotim qanday o‘tishini bilmasdim. Uning sharofati bilan o‘zimni himoyalangandek his qilyapman”, — deydi Kidman.
Qimmatbaho sovg‘a
Kit haqiqiy romantik. U to‘y kuni u o‘z sevgilisiga Emili Brontening “Wuthering Heights”ning birinchi nashrini sovg‘a qildi, bu unga 200 000 dollarga tushdi.
Asosiy istak
Aktrisa hayotidagi hamma narsadan ko‘ra ona bo‘lishni xohlardi. Ammo eng kuchli istak boshqalarga qaraganda kechroq amalga oshdi. “Menda doimo ona bo‘lish uchun katta, aql bovar qilmaydigan ehtiyoj bor edi”, — dedi Nikol.
Muvaffaqiyatsiz homiladorlik
Biroq, u ona bo‘lishidan oldin bir necha marta tashqi homiladorlik va undan ayrilishni boshdan kechirdi. Sun’iy urug‘lantirish tufayli 2008-yilda Nikol va Kitning uzoq kutilgan qizi — Sandey dunyoga keldi. 2010-yilda ularning ikkinchi qizi Feyt surrogat ona yordamida tug‘ildi.
“Buni boshidan kechirgan har bir ayol biladiki, bunday umidsizliklar osongina depressiyaga olib kelishi mumkin. Sandeyga homilador bo‘lganimda men ham ishonmadim: ehtimollik juda past edi. Men uning tug‘ilishini hayotimdagi haqiqiy mo‘jiza sifatida qabul qilaman”, — deydi Kidman.
Xobbi
Nikol qisqa hikoyalar yozishni yaxshi ko‘radi va yoshligida hatto yozuvchi sifatida karyera qurishni ham o‘ylagan. Bu urinishda uni otasi qo‘llab-quvvatlab, unga kundalik yuritishni va yozish qobiliyatini rivojlantirishni maslahat bergan.
Katta gonorar
Kidman Chanel brendi uchun to‘rt daqiqalik reklama roligida rol o‘ynagani uchun deyarli to‘rt million dollar olgan birinchi aktrisa bo‘ldi. Buning uchun u hatto Ginnesning rekordlar kitobiga kiritilgan.
Yosh va hayotga munosabat
“Men bu dunyoda imkon qadar uzoq vaqt qolishni xohlarmidim? Albatta, ha. Hali juda yosh bolalarim borligi uchun ham. Ammo hammamiz qariyapmiz. Bu haqda biror narsa qilish mumkinmi? Ayni paytda yashash va shu bilan birga eng yaxshi narsalarni namoyish etishga harakat qilish kerak. Baxtli bo‘lish lozim. Men uchun bu tushuncha oilamning farovonligi, o‘zim va barcha yaxshilikni o‘z ichiga oladi. Bu atrofda sodir bo‘layotgan narsalarni tomosha qilmaslik, shunchaki ko‘zdan kechirmaslik, balki sodir bo‘layotgan voqealarning ishtirokchisi bo‘lishni anglatadi”, — deya xulosa qiladi Nikol Kidman.
Izoh (0)