Oq uy matbuot kotibi Karin Jan-Pyer prezident Jo Bayden 2024-yilda ikkinchi muddatga nomzodini qo‘yishni rejalashtirayotganini tasdiqladi, deb yozadi “Kommersant”. Shuningdek, u 79 yoshli Baydenga salomatligi bilan bog‘liq muammolar xalal berishi mumkin, degan fikrga qo‘shilmadi.
Brifing chog‘ida matbuot kotibi prezidentni ”quvib yetib bo‘lmasligi”ni aytdi. “U bajarayotgan ishlarga qarang, u nima qilayotganiga, Amerika jamoatchiligi uchun qanday ishlayotganiga qarang”, — dedi u.
U The New York Times gazetasi maqolasida keltirilgan, Jo Baydenning yoshi uning qayta saylanishi uchun “jiddiy muammo”ga aylanishi mumkinligi (o‘sha paytda u 81 yoshda bo‘ladi) haqidagi versiyani rad etdi. “Bizni bu narsa emas, biz Amerika xalqiga qanday yordam bera olishimiz qiziqtiradi. Biz ularning hayotini qanday yaxshilamoqchimiz? Prezident shu haqda gapirmoqda. U shunga o‘z e’tiborini qaratgan va qaratishda daavom etadi”, — dedi Jan-Pyer.
“Faqat shuni aytishim mumkinki, prezident 2024-yildagi saylovga o‘z nomzodini qo‘yishni rejalashtirayotgani haqida bir necha marta aytgan va shunda to‘xtaymiz”, — deya qo‘shimcha qildi matbuot kotibi.
Nashr eslatishicha, iyunda Jo Baydenning reytingi tarixiy minimumni yangilab, 36 foizgacha tushib ketdi. Bu, hatto, Donald Trampning reytingidan ham pastroq ko‘rsatkichdir, uni esa Oq uyning joriy rahbari “tarixdagi eng yomon prezident” deb ataydi.
Baydenning faoliyatini qo‘llab-quvvatlash ko‘rsatkichlari pasayishiga, xususan, benzin narxining oshishi sabab bo‘lmoqda: Bayden prezidentligi davrida u ikki karra qimmatlashib, inflyatsiyani tezlashtirib yubordi. AQSHda, shuningdek, bolalar ovqati yetishmovchiligi muammosi yuzaga keldi hamda qurol aylanmasi ustidan nazoratning kuchaytirilishi yuzasidan bahslar keskinlashdi.
Izoh (0)