O‘zbekistonda 2022-yil 1-yanvardan xarid cheklarini “Soliq” mobil dasturi orqali ro‘yxatdan o‘tkazgan jismoniy shaxslar xarid summasidan 1 foiz keshbekka ega bo‘lmoqda. Davlat soliq qo‘mitasining ma’lum qilishicha, aprel oyida iste’molchilarga 40 milliard so‘mga yaqin keshbek to‘lab berilgan.
Ma’lum qilinishicha, aprel oyida 427 ming nafar iste’molchi tomonidan 8 milliontaga yaqin chek “Soliq” mobil dasturi orqali ro‘yxatdan o‘tkazilgan bo‘lib, shundan 7,5 milliontaga yaqin cheklarga 61,4 milliard so‘m keshbek hisoblangan.
27-may holatiga 340 mingdan ortiq iste’molchilarga 38,6 milliard so‘m keshbek to‘lab berilgan.
Qolgan keshbek summalari tadbirkorlik subyektlari tomonidan soliq hisobotlari topshirilishi, hisobotlardagi kamchiliklar tuzatilishi, soliq qarzdorligi kamaytirilishi inobatga olinib, avtomatik tarzda to‘lab boriladi.
Eslatib o‘tamiz, 2021-yilning oktabr oyida prezidentning nazorat-kassa texnikasidan foydalanishni takomillashtirishga doir qarori qabul qilingandi. Hujjat bilan 2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirgan hamda ushbu xaridni soliq organlarining maxsus mobil ilovasida xarid chekining QR kod yordamida skanerlash orqali ro‘yxatdan o‘tkazgan jismoniy shaxslarga ularning bank kartalariga oy yakuni bilan xarid summasining 1 foizi respublika budjetidan qaytariladi.
DSQ ma’lumotiga ko‘ra, endilikda chekda MXIK kodi to‘g‘ri ko‘rsatilgan barcha tovarlar (xizmatlar) uchun keshbek taqdim etiladi. Rad etish to‘liq xarid summasiga (butun chek uchun) emas, balki faqat ma’lumotlar bazasida mavjud bo‘lmagan MXIK kodi ko‘rsatilgan mahsulot (tovar va xizmat)larga nisbatan qo‘llaniladi.
Izoh (0)