O‘zbekiston xalq artisti Yulduz Usmonova 2022-yilning may oyi oxirida besh kunlik konsert dasturini muxlislariga havola qilmoqda. “Daryo” muxbiri Mirolim Isajonov konsert repetitsiya jarayonidan reportaj tayyorlash vaqtida san’atkorning ikkinchi opasi Dilorom Usmonova bilan ham suhbatlashdi.
Dilorom Usmonova singlisining yoshlik payti haqida gapirarkan, Yulduz Usmonova kichkinaligidan intiluvchan bo‘lganini ta’kidladi.
“Oilada to‘rt o‘g‘il va to‘rt qizmiz, Yulduz oltinchi farzand. Singlim yoshligida tartibli, uzoqni ko‘ra biladigan, intiluvchan qiz bo‘lgan. Bir ishning boshini tutsa, uni oxirigacha go‘zal yakunlashga harakat qilardi va buni uddalardi. Bu uning xarakterida bor edi.
17-18 yosh paytida fabrikada ishlagan. O‘sha paytlarda ham saharlab fabrikaga hammadan birinchi borardi. “Men yaxshi ishlashim, birinchi bo‘lishim kerak”, derdi. O‘shanda uning nomzodi deputatlikka qo‘yiladigan bo‘lgan. Ammo Yulduzning yoshi yetmagan. Yoshi kattaroq bo‘lganida, deputatlik maqomiga erishardi.
Fabrikada ishlagan vaqtlarida ham san’at shaydosi edi, qo‘shiqlar aytib turardi. Gavharxonim, Tamaraxonimlar ovozini eshitib, o‘zlari bilan Yulduzni olib ketishmoqchi bo‘lgan. Lekin uydagilar ko‘nmagan. Oxiri dadam rahmatli rozi bo‘lib, Toshkentga jo‘natgan va shundan keyin ko‘karib, el mehnatini qilib kelmoqda. 12-14 yoshida “Hammalaringiz hali ko‘rasizlar, men shunday Yulduz bo‘laman”, derdi va maqsadiga erishdi.
Har yili konsertlari va tayyorgarlik jarayonlarida ishtirok etaman. Hech qanday vazifam yo‘q bo‘lsa-da, oldida turib, qo‘llab-quvvatlaymiz. Uning xatti-harakati, o‘ziga bo‘lgan talabini ko‘rib, ham havas qilaman, ham qoyil qolaman. Charchasa ham, charchadim demaydi, o‘zini ayamaydi. Shuning uchun ham unga iste’dodni Xudo yuqtirgan bo‘lsa kerak. Intilganga tole yor, deyishadi-ku. Qilayotgan mehnatlari, harakatlari uchun mukofotlarni Yaratgandan olyapti”, — deydi o‘zbek primadonnasining opasi.
— Ijtimoiy tarmoqlarda Yulduz Usmonovaning ayrim fikrlari muhokamalarga sabab bo‘lgan paytlarda jigar sifatida qanday holatga tushasiz? Ichingiz achishsa kerak?
— Bilasizmi, mevali daraxtga tosh otiladi. O‘zim ham odamlar ichida ko‘p yuraman. Aksariyat odamlar Yulduzning qo‘shiqlarini sevadi. Uning fe’li kimgadir yoqadi, kimgadir yoqmaydi. Lekin biz unga o‘rganib qolganmiz, oddiy hol sifatida qabul qilamiz.
Hozir ijtimoiy tarmoqlar rivojlanib ketdi, hamma to‘g‘ri yoki noto‘g‘ri bo‘lsa ham, fikrini erkin bildiryapti. Oldin bunday bo‘lmagan. O‘z tarbiyasidan kelib chiqib, tarbiyasiz fikrlar aytganlarga e’tibor bermaymiz.
Har qanday insonning o‘ziga yarasha fe’l-atvori bor. Bizning Yulduz shunday bo‘lishida ana shu fe’li yordam bergan. Ana shunday fe’lli bo‘lgani uchun Yulduz Yulduz bo‘lgan. Biz uni judayam yaxshi ko‘ramiz. Qarindosh-urug‘lar barchamiz sevamiz.
Reportajni “Daryo”ning YouTube’dagi sahifasi orqali ham tomosha qilishingiz mumkin.
Izoh (0)