Tojikistonda aksilterrorchilik operatsiyasi o‘tkazilmoqda

Tojikiston Ichki ishlar vazirligi mamlakatda aksilterrorchilik operatsiyasini e’lon qildi, deb xabar bermoqda Tengrinews.

Idora ma’lumotlariga ko‘ra, uyushgan jinoiy guruh a’zolari jamoatchilik-siyosiy vaziyatni beqarorlashtirish maqsadida bevosita davlat chegarasi chizig‘ida, Rushon tumanidagi avtomobil yo‘lida Dushanbe—Ko‘lma xalqaro avtotrassasini noqonuniy ravishda to‘sib qo‘ygan.

“Jinoyatchilar xalqaro terrorchilik tashkilotlari ko‘magida mamlakat tashqarisida qurol va o‘q-dorilarni qo‘lga kiritgan, shuningdek, terrorchilik harakatlarini va boshqa shakldagi provokatsiyalarni amalga oshirish uchun chet ellik yollanma askarlarni jalb qilgan”, — deyiladi IIV xabarida.

Avesta portal ma’lumotlariga qaraganda, uyushgan jinoiy guruh a’zolari huquq-tartibot organlari xodimlarining qurol va o‘q-dorilarni topshirish haqidagi qonuniy talablarini bajarmagan va qurolli qarshilik ko‘rsatgan. Shu vaqtga kelib Rushon tumanidagi yo‘lning bir qismida Tojikiston huquq-tartibot organlari tomonidan aksilterrorchilik operatsiyasi boshlangan.

Qo‘lga olinganlar va jabrlanganlar haqidagi tafsilotlar oshkor etilganicha yo‘q.

Ba’zi OAVlar yozishicha, aslida Rushon tumanida hukumat qo‘shinlari va Xorug‘ shahriga olib boruvchi yo‘lni to‘sgan aholi o‘rtasida to‘qnashuvlar bo‘lib o‘tgan, oqibatda bir necha kishi jabrlangan.

Eslatib o‘tamiz, Tojikistondagi Tog‘li Badaxshon muxtor viloyatining Xorug‘ shahrida 14-may kuni bir necha yuzlab aholi norozilik aksiyasiga chiqib, viloyat rahbari Alisher Mirzonabot va Xorug‘ meri Rizo Nazarzodaning iste’fosini talab qilgan edi. Hukumat ushbu xatti-harakatlarni terrorizm deb baholashi va ularga tegishlicha javob ko‘rsatishini ma’lum qilgandi.