AQSH 2022-yilgi Pulitser mukofoti g‘oliblarini e’lon qildi — bu 1917-yildan beri topshiriladigan dunyodagi eng nufuzli jurnalistika mukofotlaridan biri hisoblanadi.
Washington Post jurnalistlari mukofotni eng nufuzli nominatsiya bo‘yicha “Hujum” materiali uchun olishdi. Material 2021-yilning yanvarida Kapitoliy binosiga bostirib kirishning batafsil xronologiyasini o‘z ichiga olgan.
The New York Times gazetasi tahririyati “Milliy reportaj” (hibsga olish paytida politsiya tomonidan o‘ldirilgan amerikalik haydovchilar haqida) va “Xalqaro reportaj” (Yaqin Sharqda Amerika o‘qlaridan tinch aholining o‘limi haqida) uchun mukofotlarga sazovor bo‘ldi.
“Tezkor xabarlar” nominatsiyasida Miami Herald jamoasi yetakchilik qilgan bo‘lsa, Tampa Bay Times tahririyati tadqiqot jurnalistikasi yo‘nalishida g‘oliblikni qo‘lga kiritdi.
Ukrainalik jurnalistlar 2022-yilgi Pulitser mukofoti uchun alohida e’tirofga sazovor bo‘ldi.
“Pulitser mukofoti kengashi Ukraina jurnalistlarini Vladimir Putinning ushbu mamlakatga bosqini va Rossiyadagi propoganda urushi davridagi jasorati, chidamliligi va voqealarni haqqoniy yoritgani uchun alohida maqtov bilan taqdirlashdan mamnun. O‘z saflarida portlashlar, odam o‘g‘irlashlar, ishg‘ol va hatto o‘limga qaramay, ular qat’iyat bilan dahshatli voqelik haqida aniq tasavvur berishga harakat qilmoqda, bu esa Ukraina va butun dunyo jurnalistlarini sharaflaydi”, — deyiladi mukofot veb-saytida.
Izoh (0)