Foto: Hind kinosining eng mashhur juftliklari yillar davomida qanchalik o‘zgardi?

Bollywoodtime nashri o‘tgan asrning 70–80-yillarida ekran orqali barchaning ko‘nglidan joy olgan sevimli juftliklar vaqt o‘tishi bilan qanday o‘zgarganini ko‘rib chiqdi.

Hema Malini va Dharmendra

Bu ajoyib juftlik tomoshabinlarga 30 ga yaqin hamkorlikdagi filmlarni taqdim etdi, ular orasidan “Zita va Gita”, “Qasos va qonun”, “Sevimli Raja”, “Ali Bobo  va qirq qaroqchi” filmlari muvaffaqiyatga erishgan. Ular nafaqat ekranda, balki hayotda ham hind kinosining ko‘plab muxlislarining sevimli juftligidir. Yulduzli juftlik 40 yildan ko‘proq vaqt davomida baxtli hayot kechirib kelmoqda va birgalikda 6 farzandni tarbiyalab, 13 nabiraning bobo va buvisiga aylangan.

Rishi Kapur va Dimpl Kapadiya

Rishi va Dimpl 1973-yilda “Bobbi” debyut filmi chiqqandan keyin mashhurlikka erishdi. Yosh juftlik butun dunyo bo‘ylab millionlab tomoshabinlarning qalbini zabt etdi. Sobiq ittifoq davri prokatida ushbu film barcha davrlarda eng ko‘p tashrif buyurilgan xorijiy filmlar reytingida 22-o‘rinni egallaydi.

“Bobbi” filmidan keyin Dimpl bolalarni tarbiyalash uchun kinoni tark etdi, lekin bir necha yil o‘tgach, u yana qaytdi va Rishi bilan bir necha marta birgalikda suratga tushdi. Afsuski, 2020-yil aprel oyida Rishi Kapur saraton kasalligidan vafot etdi.

Amitabh Bachchan va Rekha

Bollivuddagi eng ko‘p muhokama qilingan juftliklardan biri tomoshabinlarga 10 ga yaqin qo‘shma loyihalarni taqdim etdi. Ko‘p yillar o‘tgan bo‘lsa-da, ularning haqiqiy hayotdagi romantikasi hali ham ommaviy axborot vositalarida muhokama qilinmoqda. Bir vaqtlar Rekha va Amitabh tadbirlarda bir-birlari bilan uchrashishdan astoydil qochgan, ammo endi ular bir-birlarini ko‘rsa, salomlashadi. Ikkalasi ham ajoyib ko‘rinishda bo‘lib, keksalikni munosib kutib olgan.

Anil Kapur va Shridevi

“Janob Hindiston”, “Muhabbat lahzalari”, “Ayriliq” — ularning Bollivuddagi juftligi haqiqatan ham ajoyib edi. Haqiqiy hayotda qaynuka va kelinoyi — Anil va Shridevi birgalikda o‘ndan ortiq loyihalarda ishtirok etdi. Shridevi 80-90-yillarda Bollivudda mashhurlikka erishdi va ona bo‘lgach, sohani tark etdi. Afsuski, 2018-yilda aktrisa baxtsiz hodisa tufayli vafot etdi.

Nilam va Govinda

80-yillarning oxirida Nilam Govindaning nafaqat ekranda, balki hayotda ham sevimli yo‘ldoshi edi. Maftunkor va bir-biriga oshiq bo‘lgan juftlik 14 ta filmda suratga tushdi. Afsuski, Govinda allaqachon turmush qurgan va farzandli ekani ma’lum bo‘lgach, ularning ajoyib sevgi hikoyasi yakun topdi. Og‘riqli ayriliqdan so‘ng ular uzoq vaqt muloqot qilmagandi va yaqinda ular musiqiy shouda yana uchrashishdi. Uzoq vaqtdan beri davom etgan ginalar unutildi, chunki ikkisi ham o‘zining turmush o‘rtoqlari bilan baxtli.

Amir Xon va Juhi Chavla

Bollivudning ekrandagi eng muvaffaqiyatli juftliklaridan biri Amir va Juhi 80-90-yillarning sevimlilari edi. Ularni go‘zal sevgi hikoyalari va sahna ortidagi iliq do‘stlik mashhur qildi. Afsuski, suratga olish maydonchasidagi kelishmovchiliklarning biridan so‘ng Amir va Juhi birga ishlamadi, lekin oxir-oqibat, tadbir va marosimlarda yarashib olishdi.

Sanni Deol va Madhuri Dikshit

Sanni va Madhuri ham tomoshabinlarni o‘ziga jalb etuvchi Bollivud aktyorlari kabi mashhur edi. Juftlik yaqinda musiqiy shouda uchrashib qoldi va o‘zlarining mashhur “Main Teri Mohabbat Mein” trekiga raqsga tushdi.